Келшымаш
+25 °С
Раш
Все новости
Культура
22 Сорла 2023, 14:06

Усталык фейерверк

Мишкан селасе Герой-влак аллейыште гитар кас эртен

Усталык фейерверк
Усталык фейерверк

Пайрем 16 августшто эртаралте. Тиде кечын ныжыл йўр йўрын эртыш, сандене паркыште чытыдымаш шокшо кече деч вара шўлалташ моткоч лайык ыле.
Кас шумеке, аллейысе сцене воктене самырык-влак чумыргаш тўҥальыч, ик жап гыч кугурак-влакат тольыч. Концертым ончаш тўрлӧ еҥ толын. Нунын коклаште студент, тунемше, икшыве-влак дене ава, ача-влак, «Кино» да «Король и шут» группа-влакын поклонникышт (нуным футболкышт гыч виклан пален налаш лийын) лийыныт. Пайрем деч ӧрдыжеш кувава-влакат кодын огытыл, нуно мурым мурымо годым йолыштым тавен шинченыт.
Тиде кастене сценыште ятыр уста артист выступатлен. Ондак усталыкыштым Пўрӧ ола гыч уна-влак ончыктеныт – Анна, Вероника да Дмитрий. Нуно «Король и шут» группын репертуарже гыч муро-влакым йоҥгалтареныт. Нунын деч вара сценышке шкенан йєратыме артистна-влак лектыныт. Зритель-влаклан поснак тўрлӧ университетлаште кокымшо курсышто тунемше ўдыр-влакын мурышт келшен – Айдинан, Гузельын, Каринан, Лианан да Настян. Нине ўдыр-влакым Мишкан селаште илыше-влак сайын шарнат. Нуно шукерте огыл «Diamond kids» вокальный группышто муреныт да калыкым РДК-ште эртыше кажне концертыште куандареныт.
Ильгиз ден Сергейынат мурымыштым калык шокшын вашлийын. Концертым музыкант да мурызо Станислав Салиев устан вўден. Пайремым поснак «Пилигримм» музыкальный группа сєрастарен. Ончышо-влак чыланат нунын дене пырля муреныт да «Молодцы!», «Браво!» манын кычкыреныт. Тиде группа 2022 ийыште шочын да шке пашаштым уло кумылын йӧратыше еҥ-влак гыч шога. Чаманаш кодеш, тений пайремышке музыкантна-влак чыланат толын кертын огытыл. Станислав ден Сергей Салиевмыт (ачаж ден эргыже), «Diamond kids» группын ончычсо мурызыжо-влак деч посна Линар Ахатов (гитар, вокал) ден Александр Дмитриев (барабан) выступатленыт.
Мишкан селаште тыгай ямле да чонан концертым эртарыше, тушто участвоватлыше-влаклан чылаштланат чон гыч лекше тау мутым ойлымо шуэш. Пайрем кажне еҥын кумылжым нӧлталын да калыклан нимучашдыме куаным конден.
Артист-влаклан чылаштланат творческий сеҥымашым тыланена да мемнам уэшын тыге куандарымыштым вучена!
Н. КОШИЕВА.

Усталык фейерверк
Усталык фейерверк
Усталык фейерверк
Усталык фейерверк
Усталык фейерверк
Усталык фейерверк
Автор:Светлана Тоймурзина