«Саскавий - 2023»

Тиде кечын Мишкан Культура дворецыште «Саскавий» конкурс эртен. Тиде конкурсышто Мишкан, Калтаса, Краснокам, Балтач, Нуриман районла гыч индеш мотор ўдыр шке мастарлыкшым ончыктен. Конкурсын условийже почеш конкурсант-влакын ийготышт 16 гыч 28 ияш марте лийшаш, шочмо йылмым, шочмо калыкын йўлажым, тўвыражым палышаш лийыныт.
Эн мотор Саскавий лўмым налшаш верч конкурсант-влаклан икмыняр текшырымаш гоч эрташ кўлын. Ик тўҥ заданийлан кидпаша шотлалтын. Конкурсант-влакын кидпаша выставкыштым РДК-н фойештыже вераҥдыме. А сценыште конкурсный заданий-влак тўҥалыныт. Икымше заданий «визитный карточка» манылтын. Тыште кажне ўдыр шкеж ден палдарен - йӧратыме пашаже, тунеммыже, ешыже, хоббийже.
Мӧҥгӧ паша заданийыште конкурсант-влак «Мыйын илыш гыч ик кече» видеороликым ямдыленыт. Тудым ўдыр-влак шкеныштын социальный сетьыштышт вераҥденыт. А залыште шинчыше-влак нунын мӧҥгӧ пашаштым кугу экран гоч ончен, ик кечым ўдыр-влак дене пырля эртареныт.
Конкурсный заданий-влак вич балл дене аклалтыныт.
«Усталык конкурс» заданийыште ўдыр-влак художественный самодеятельность дене мастарлыкыштым ончыктеныт. Ӱдыр-влак муреныт, куштеныт, почеламутым лудыныт. Дарья Хамитова трио дене выступатлен. Тудлан полшаш толшо-влак дене пырля калак дене марий сем-влакым шоктеныт. Тымбай ялын мотор ўдыржє Карина Ибашева «Рвезылык» куштышо коллективын участницыже улеш. Тудо ансамбль дене пырля весела марий куштымашым ончыктен. Пўрӧмучаш гыч Владислава Иванова Яныш Ялкайнын возымо произведенийже гыч ужашым сылнын лудын. Тудлан кўкшӧ баллым шынденыт. Тиде конкурсышто тыгак вич баллым Настасья Александрова, Виолетта Айбердина да Элина Матвеева налыныт.
Палемден кодаш кўлеш, кажне выступленийлан ўдыр-влак вургемыштым вашталтен чиеныт. «Этнографический» конкурсышто ўдыр-влакын грамотностьышт да эрудицийышт текшыралтын. Конкурсант-влаклан экраныште сорла, шўдыр, тырма, шаньык, катман, кид вакш, кўнчылавондо, вургем мушмо оҥа, шўч утюг ончыкталтыныт. Нунын марла лўмыштым ойлаш кўлын. Ӱдыр-влак моштымышт семын нине арвер-влакын молан кучылталтмыштым умылтареныт.
«Сий кочкыш» заданийыште конкурсант-влаклан калык кочкышым ончыкташ кўлын. Тидыжым нуно мӧҥгыштышт ямдылен конденыт. Кызыт шошо, ушкал-влакын презылыме жапышт. Сандене, очыни, шуко ўдыр тувыртышым конден. Тиддеч посна жюрилан аклаш мелна, подкогыльо, пўкштуш, перемеч да молымат конденыт.
Конкурс мучашлалтын. Жюрий иктешлымашым ышташ каен. А тиде жапыште Культура дворецын артистше-влак изирак концертым ончыктеныт. Тыгак Краснокам да Калтаса районла гыч толшо уна-влак шке мастарлыкыштым ончыктеныт. Конкурсышто участвоватлыше Элина Матвеева ден аваже «Мамык шаль» мурым йоҥгалтареныт.
Теве кужун вучымо жап, конкурсым иктешлымаш. Жюри член-влак сценышке лектыныт. Вич ўдыр тўрлє номинацийыште палемдалтын: Мария Захарова (Балтач район) - «Эн шыма», Карина Актимирова (Мишкан район, Арзамат) - «Чолга шўдыр», Алина Асеева (Нуриман район) - «Марий йўлам ончыко шуйышо», Карина Ибашева (Мишкан район, Тымбай) - «Эн ныжылге», Дарья Хамитова (Мишкан район, Ардаш) - «Эн поро кумылан».
Кумшо верым Краснокам район гыч Виолетта Айбердина налын. Кокымшо верыш Мишкан район Пўрємучаш гыч Владислава Иванова лектын. Икымше вер Мишкан район Корак ял гыч Настасья Александровалан логалын. А гран-прим да «Саскавий - 2023» чап лўмым Калтаса гыч 16 ияш Элина Матвеева налын.
- Мый луымшо классыште тунемам. Мураш, кушташ, спектакльлаште модаш йӧратем, - ойла сеҥыше ўдыр. - Конкурс пеш поро шўлыш дене эртыш, кажне участниклан сеҥыше лўмым пуаш лиеш ыле, очыни. Чылан мастар улыт. Мыйын выступлением ончышо-влаклан да жюрилан утларак келшен, очыни. Еҥ-влак кужу жап совым кыреныт, жюри сай акым шынден.
«Саскавий - 2023» конкурсым вўдаш «Саскавий - 2021» конкурсышто сеҥыше Анастасия Ялкаевалан ўшаненыт.
Светлана ТОЙМУРЗИНА.