«Оҥгыр йўк»

«Оҥгыр йўк» конкурсышто шкенжын усталыкшым 16 мурызо ончыктен. Нуно Мишкан да Дӧртыльӧ районла гыч лийыныт. Рашрак лияш гын, Мишкан район гыч 14 еҥ да Дӧртыльӧ район гыч 2 еҥ. Гран-Прим Дӧртыльӧ район гыч толшо мурызо сеҥен налын.
Мурызо-влакын усталыкыштым посна жюри аклен, тушко Валерий Садретдинов, Ирина Аликаева да Динара Владимирова пуреныт.
Конкурс сайын эртыш. Но моло район гыч участник-влак толдымаш кугун ойгатарен. А вет ик тылзе ончыч гына Пўрӧ олаште марий конференций эртыш. Тушто марий йылмым, тўвырам арален кодымо, йоча-влак дене ыштыме пашам вияҥдаш кўлмӧ нерген шуко ойлышна. Марий йылмым туныктышо-влак, культура пашаеҥ-влак, кушто улыда? Тўрлӧ районласе марий национально-культурный автономий вуйлатыше-влакат ӧрдыжеш кодмыла чучеш. А вет нунылан конкурсын положенийжым ончылгоч колталтын. Ончыкыжым ме тендам кажне конкурсышто ужнена. Мишкан села гычат ик участникат лийын огыл. Тидат шўлыкаҥда. Туге гынат, сайлан ўшанаш тўҥалына. «Оҥгыр йўк» ончыкыжым эшеат яндарын йоҥгалтшаш.
Алексей ИБУЛАЕВ.