Шинчымаш пайрем

Икымше сентябрьыште тиде тунемме заведенийыште пайрем кумыл озаланен. Туныктышо-влакат, студент-влакат мероприятийыш мотор вургемым чиен миеныт. Ик жап гыч тудын торжественный ужашыже тӱҥалын – Россий Федерацийын да Башкортостан Республикын гимнышт йоҥгалтыныт, БР вуйлатышын стипендиантше Александр Зайнетдинов ден туныктышыжо – Светлана Ибаева государственный флаг-влакым нӧлталыныт. Тылеч вара мероприятий вӱдышӧ-влак Шинчымаш кечылан лӱмлалтше торжественный линейке почылтмо нерген увертареныт. Линейкыште эн почетан вер-влакым икымше курсышко тунемаш пурышо-влак да пытартыш курсышто тунемше-влак налыныт.
Студент, ача-ава да туныктышо-влакым Шинчымаш кече дене Мишкан селасе агропромышленный колледж директор пашам шуктышо Салават Мустафин саламлен. Посна шомакым тудо икымше курсышко тунемаш пурышо-влаклан каласен:
- Те илышыштыда у – мутым кучымым йодшо йыжыҥышкыже куснеда – ойырен налме профессийланда тунемаш тӱҥалыда, - каласен тудо. – Мемнан колледжым, шонемат, арам огыл ойырен налында – тугеже илышдам агропромышленный отрасль дене кылдаш палемденда. Те пеш сай пашам ойырен налында. Мланде пашаеҥ-влак пӱтынь элым пукшат, нунын пашашт пеш шерге да суапле. Тыланда тургыжланаш вер уке - мемнан педагогна да матерна-влак тендам сайын туныктат да чын мастер лияш полшат.
Кугырак класслаште тунемше-влаклан Салават Мухаметович пеҥгыде лияш да, сайын тунем лекмеке, илышыштышт шке верыштым муаш, элнан чын гражданинже лияш тыланен.
Салам шомак деч вара агроколледж вуйлатыше тунеммаште да пашаште ойыртемалтше студент-влакым чап кагаз дене палемден.
Тылеч вара мутым Мишкан район МР администраций вуйлатышын социальный йодыш да кӧргӧ политике шотышто заместительже пашам шуктышо Диана Муратбаевалан пуымо. Тудо педагог, мастер-влаклан шкеныштын пашаштым шуктымаште кугу сеҥымашыш шуаш, студент-влаклан сайын тунемаш да тунемме учрежденийын пырдыжше гыч сай специалист лийын лекташ да шкеныштын вийыштлан ӱшанаш тыланен.
- Шинчен шогыза – те оҥай да уста айдеме улыда, тыгай еҥ-влак т¢нямбалне тетла укелыт, - каласен тудо. – Кажне еҥын сеҥымаш деке корныжо тӱрлӧ, но нуным икте ушен шога – шкеныштын вийыштлан да усталыкыштлан ӱшан.
Д. Муратбаева деч вара торжественный линейкыште выпускной группышто тунемше Степан Изиляев ыступатлен. Тудо самырыкрак йолташыже-влаклан нелылык деч лӱдде да тыршен тунемаш, колледжын мер илышыштыже чулымын участвоватлаш тыланен. Тыгак тушто тунемме жапым аклен илаш темлен, вет илышыште шеҥгек савырнен ончалаш гын, тунемме жапна эре эн волгыдо да йомартле улмо раш коеш.
Тылеч вара мутым Россий МВД-н Мишкан районысо отделенийжын ГИБДД отделжын начальникше, полиций майор Александр Шамидановлан пуымо. У тунемме ий тӱҥалме дене саламлымыж годым законым аралыше органын представительже самырык-влаклан кеч-могай траспорт дене коштмышт годым корнышто коштмо правилым шукташ тыланен.
Чылам саламлымаш деч вара кужу жап вучымо тат шуын – икымше оҥгыр йӱк йоҥгалтын. Оҥгырым рӱзалташ чапым икымше да пытартыш курсышто тунемше-влаклан пуымо. Торжественный митинг Россий Федерацийын да Башкортостан Республикын гимнышт дене мучашлалтын.
Колледжыште тунемше-влакын икымше класс шагатышт «День знаний: традиционные российские духовно-нравтсвенные ценности» теме почеш эртен.