«Нунын шыргыжмыштым ужаш кугу пиал…»

Тенийсе тунеммме ий латик классыште тунемше 27 йочалан пытартыш, а икымше классыш толшо 47 ўдыр-эргылан икымше тунемме ий лиеш. Икымше классыш толшо-влакым шинчымаш тўняшке Надежда Ишалина ден Расима Абхаликова пуртат.
У тунемме ий тўҥалме шотышто торжественный линейкым школын директоржо Константин Гайнетдинов почын. Тудо шке выступленийыштыже икымше классыш толшо-влакым шке илышыштышт у йыжыҥыш вончымо дене саламлеен, а ончыкылык выпускник-влаклан, школым сайын тунем пытарен, кумда илыш корныш лекташ, илышыште шке верым муаш тыланен.
Шинчымаш кечын школышко икымше гана толшо-влакын выступленийышт тиде школышто поро йўлашке савырнен. Теният эн изи тунемше-влак кўчык почеламут-влакым ойленыт. А латикымше классыште тунемше-влак нунылан поро тыланымашым ойленыт.
Кажне еҥын илышыштыже икымше туныктышо эн поро шарнымашым гына кода. Тиде кечын икымше классыш толшо-влакын «кокымшо авашт» Расима Загитова шуко поро мутым ойлен. Тудо первоклассник-влакым илыш тошкалтышын у кўкшытышкӧ нӧлталтмышт дене шокшын саламлен.
Икымше классыш толшо-влаклан пӧлекым, а туныктышо ден уна-влаклан пеледышым пӧлеклыме.
Торжественный линейкыште тунемше, туныктышо да ача-ава-влакым Мишкан район администрацийын пашажым виктарыше Рамиль Сафин, образований отделын методистше Наталья Шаркаева, СВО ветеран-влак ассоциацийын Мишкан районысо отделенийжын вуйлатышыже Рамиль Салихов шокшын саламленыт.
- 1 сентябрь мыланем эре ойыртемалтше кече лийын, а тений тудо поснак шерге, - каласен Рамиль Салихович. – Ме коллегына-влак дене пырля районышто «Шкенан икшывына-влак» акцийым эртарышна. Тиде – фронтышто вуйыштым пыштыше-влакын икшывышт пелен лияш товатлымаш. Тений тиде акцийышке СВО ветеран-влак Евгений Шамшиев, Михаил Кильмакаев, Игорь Шамукаев, Сергей Кайниев ушненыт. Ме линейкыште лийме дене гына огына серлаге, икымше классыш толшо-влакын суртыштышт лийынна. Тортым, моло пӧлекым кучыктенна. Йоча-влак куаненыт, ава-влак шинчавўд йӧре тауштеныт. Мыланем тенийсе шинчымаш кече еш пайремыш савырнен. Мыйын изи эргым – Мансур икымше классыш тунемаш кая. Мый шуко корным эртенам, но эргым икымше гана школыш ужатыме корно деч шергыже лийын огыл.
Тиде акцийым Башкортостан Республикысе СВО ветеран-влак ассоциаций организоватлен. Республик вуйлатыше Радий Хабиров шке соцсетыштыже возен: «Мыланна йот йоча уке. Сандене ме кутырен келшенна, герой-влакын икшывышт – мемнан икшывына. Нунылан йол ўмбаке шогалаш полшымаште ме чыла ыштышаш улына».
- Таче нунын шыргыжмыштым ужаш кугу пиал, - каласен Рамиль Салихов.
Тений икымше оҥгыр йўкым пуаш латикымше классыште тунемше Николай Айкашев ден икымше классыште тунемше-влак Амелия ден Милана Гизетдиновмытлан ўшаненыт.
Пытартышлан выпускник-влак 1 «а» ден 1 «б» класслаште тунемше-влакым икымше урокышкышт ужатеныт.