Августовский конференций эртен

Туныктышо-влакын август тылзыште погынымашышт – тиде кугу педагогический совет, тушто нуно эртыше тунемме ийым иктешлат да шушаш ийлан планым ыштат. Конференцийын темыже «Ончыкылыкысо образований таче тӱҥалеш» («Образование будущего начинается сегодня») манылтын. Тудын вашеш районысо Тӱвыра полатын фойештыже туныктышына-влакын пашашт дене палдарыше выставке организоватлалтын.
- 2026 ий – посна чек, - каласен конференций тӱҥалтыште мероприятий вӱдышӧ Василий Кутлуметов. – Тиде залыште Россий калык-влакын икоян улмо идалыкышт, Кугу да келшен илыше еш-влак идалык да Дошкольный образований идалык ушненыт.
Вӱдышын салам шомакше деч вара кӱчык сценический представленийым ончыктымо: сценышке кум - руш, пошкырт да марий еш лектыныт. Нуно Россий калык-влакын икоян улмыштым пеҥгыдемденыт.
Тылеч вара совещанийын пленарный ужашыже тӱҥалын. Августовский совещанийын пашашкыже БР-се тӱвыра министерствын этнокультурно вияҥме да регион-влак коклаште кылым кучымо шотышто отделжын начальникше, БР тӱвыран заслуженный пашаеҥже, философий наука кандидат Нурлан Ганиев, БР-се просвещений министерствын государственный итоговый аттестаций отделжын начальникше Айгуль Байрамгулова, БР-се Мишкан район МР администраций вуйлатыше Лариса Александрова, районысо образований отдел начальник Сергей Александров, Мишкан да Бурай районласе военный комиссар Сергей Воробьёв, педагогический пашан ветеранже, образовательный организаций вуйлатыше, туныктышо-влак ушненыт. Конференцийын модераторжо пашам БР-се Мишкан район МР администраций вуйлатышын социальный йодыш да кӧргӧ политике шотышто заместительже пашам шуктышо Диана Муратбаева шуктен.
Погынышо-влакым видеообращений йӧн дене Россий Федераций Просвещений министр Сергей Кравцов саламлен. Тылеч вара погынышо-влак ончылно Мишкан район МР администраций вуйлатыше Лариса Александрова выступатлен.
- Районын образовательный системыже школ-влак гыч гына огеш шого, - палемден тудо. – Тушко тыгак йоча сад-влак, Мишкан агропромышленный колледж пурат. Йоча садлаште йоча-влак тӱҥалтыш шинчымашым налыт, поро ден осалым, сай ден удам ойыраш тунемыт. Колледжыште самырык-влак тӱрлӧ профессийым налыт. Нине учреждений-влак посна задачым шуктат да шкеныштын ончылно шогымо пашам сайын ыштат.
Вес кугу йодыш СВО-н участникше але тиде согышышто вуйыштым пыштыше-влакын икшывыштлан полышым ончыктымаш дене кылдалтын. Мишкан районышто тыгай йоча-влаклан тӱрлӧ полыш ончыкталтеш. Школышко каяш шудымо йоча-влаклан йоча садлаште вер черет деч посна ойыралтеш, школышко коштшо йоча-влак чыла кружок ден секцийышке тугок коштын кертыт. Школышто тыгай йоча-влакым тугок пукшат, лагерь ден санаторийлаште тазалыкыштым пеҥгыдемдаш путевкым тугок пуат, икымше классышке тунемаш пурышо йоча-влаклан канцеляр сатум налаш сертификат пуалтеш.
Тылеч вара Лариса Геннадиевна Башкортостан Республик вуйлатыше-влаклан да БР-се просвещений министрлан районысо образований системым вияҥдаш полшымыштлан тау мутым каласен. Нуным тауштымеке, туныктышо да воспитатель-влакым чылаштымат у тунемме ий тӱҥалме дене саламлен, чылаштланат пашаштым сайын шукташ да кугу сеҥымашыш шуаш тыланен. Выступлений мучаштыже район вуйлатыше сайын тунемше да талантан йоча-влакым палемден. Нунылан Мишкан район МР вуйлатыше деч премийым кучыктымо. Тунемше-влак тӱрлӧ номинацийыште палемдалтыныт. Мишкан селасе Ф. Буляков лӱмеш 1 №-ан лицейыште 8 классыште тунемше, йоча искусство школын воспитанницыже Анна Салмиярова «Социально-значимая и общественная деятельность, художественное творчество» номинацийыште сеҥен, Мишкан селасе 2 №-ан шуко профилян полилингвальный школышто 11 классыште тунемше Залина Габдрахманова – «Научно-техническое творчество и учебно-исследовательская деятельность» номинацийыште, Монар ялысе школышто 8 классыште тунемше Богдана Байметова – «Любительский спорт» номинацийыште, Мишкан агропромышленный колледжыште 2 курсышто тунемше Ализа Гарифуллина – «Профессиональное мастерство» номинацийыште.
Лариса Александрова Мишкан район МР администраций да советын чап кагазышт дене пашаштышт ойыртемалтше туныктышо-влакым да Бадамшинмыт тукымым палемден. Тиде тукымын чумыр педагогический стажше 650 ий утла.
Наградым налмеке, шкенжын паша тукымжо дене изишак Ардаш ялысе Совет Союзын Геройжо И. Ишкининын лӱмжым нумалше кыдалаш школышто туныктышо Евгений Бадамшин палдарен.
Палемдымаш деч вара мутым лӱмлӧ уна - БР-се тӱвыра министерствын этнокультурно вияҥме да регион-влак коклаште кылым кучымо шотышто отделжын начальникше, БР тӱвыран заслуженный пашаеҥже, философий наука кандидат Нурлан Ганиевлан пуымо. Тудо шкенжын выступленийыштыже шочмо йылмым туныктымаште сай могырко вашталтышым палемден. Мутлан, йоча садлаште марий йылмым тунемше йоча-влакын чотышт 122 гыч 243 йоча марте артен. Нурлан Рашитович тыгак чыла школыштат 5-ше класслаште тунемше-влаклан «Духовно-нравственная культура России» курс пуртымым палемден. Воспитатлыме пашаште кугу вер патриотический воспитанийлан ойыралтеш – школ-влак профессийым ойырымо шотышто йодыш почеш верысе военный комиссариат дене кылым кучат...
Нурлан Ганиев деч вара Мишкан районысо образований отдел начальник Сергей Александров выступатлен. Тудо районысо школ-влакын у тунемме ийлан ямде улмыштым палемден да районысо образованийын состоянийже дене палдарен. Мишкан районышто 1 сентябрьыште тений школышко тунемаш 2343 йоча кая. Нунын кокла гыч 160 ӱдыр-эрге икымше классышке тунемаш пура.
БР-се просвещений министерствын государственный итоговый аттестаций отделжын начальникше Айгуль Байрамгулова шкенжын выступленийыштыже республикысе тунемше-влакын тӱрлӧ конкурс ден олимпиадылаште сай результатым ончыктымым палемден. Мутлан, олимпиаде-влак шотышто эн сай 5 регион коклашке пуренна. Шӱдӧ баллан тунемше-влакым ямдылымыштлан 150 тӱжемаш премийым 152 туныктышылан тӱлымӧ. Мишкан районат тидын шотышто «ужар зонышто» улеш. Школлаште тачысе кечылан психолог-влак ситышын улыт, лӱдыкшӧ кораҥдалтын – чыла образовательный учрежденийыште тревожный кнопка ден металлодетектор-влак улыт.
Тылеч вара БР-се просвещений министерстве ден БР-се Государственный Погын – Курултайын представительышт туныктышына-влакым шушаш 1 сентябрь пайрем дене алал кумылын саламленыт да пашам сай лектыш дене ышташ, таза-эсен да пиалан лияш тыланеныт. Ойыртемалтше туныктышо-влаклан чап кагазым кучыктеныт.
Мишкан да Бурай районласе военный комиссар Сергей Воробьёв школышто йоча-влакым патриот шӱлышеш воспитатлыме нерген ойлен. Тиде пашам сайын шуктышо школ-влакым тауштыме серыш дене палемден.
РФ просвещений министерстве 2026 ийым Образований системыште дошкольный образований идалык семын увертарен. Тидым дошкольный образованийым вияҥдыме, йоча сад-влакын инфраструктурыштым саемдыме, педагог-влаклан ешартыш полышым ончыктымо верч ыштыме. Мишкан районысо дошкольный образований системе дене тиде кечын районысо образований отделын методистше Ирина Кусюкбаева палдарен.
Августовский конференцийын пленарный ужашыштыже тыглай туныктышо-влакланат мутым пуымо. Мутлан, Мишкан селасе Ф. Буляков лӱмеш 1 №-ан лицейыште физикым туныктышо Гузель Алексеева школлаште йоча-влакын усталыкыштым почмо да вияҥдыме верчын келшыше образовательный средам ыштыме нерген ойлен.
Августовский конференций мучаште погынышо-влакым самырык туныктышо-влак дене палдарыме. Тений районышкына кок специалист пашам ышташ толын. Ангелина Патрикеева Мишкан селасе Ф. Буляков лӱмеш 1 №-ан лицейыште директорын информационный технологий-влак шотышто заместительже лийын ышташ тӱҥалеш, а Лилия Ибатуллина - Кӱшыл Шогертен ялысе тӱҥалтыш школышто дошкольный группын воспитательже лиеш. Самырык педагог-влакым официально саламлаш мутым Мишкан селасе 1 №-ан лицейыште тӱҥалтыш класслаште туныктышо Юлия Янгубаевалан пуымо. Тудлан вашмутым Ангелина Патрикеева пуэн:
- Мый, ме – самырык туныктышо-влак, тений районысо педагог-влак коллективышке ушнымылан моткоч куаненам! Ме пашанам тыршен ышташ, туныктышо пашан чаплӱмжым кӱлеш кӱкшытыштӧ кучаш тыршаш сӧрена!
Школ – тиде изи сандалык. Тушто тунемме идалык мучко тӱрлӧ конкурс ден мероприятий-влак эртат. Нунын коклаште спортивный таҥасымаш-влак поснак кугу верым налын шогат. Башкортостан Республикысе тунемше-влак кокласе 28-ше спартакиадын лектышыж дене Мишкан селасе йоча-юноршеский спорт школ директор Роман Ямаев палдарен.
Августовский конференцийын кокымшо ужашыштыже пашаштышт ойыртемалтше туныктышо-влакым Мишкан районысо образований отделын да Общероссийский образований профсоюзын Мишкан районысо организацийжын чап кагазышт дене палемдыме. Туныктышо-влаклан наградым Общероссийский образований профсоюзын Мишкан районысо организацийжын председательже Лилия Мустафина кучыктен.
Мероприятийым тиде кечын Мишкан селасе Тӱвыра пӧртын артистше-влак, Йылыш ялысе школышто туныктышо Лилия Хизяева, Мишкан селасе 2 №-ан шуко профилян полилингвальный школышто марий йылме да литературым туныктышо Надежда Салиева да Мишкан селасе «Солнышко» йоча садын коллективше сӧрастареныт. Конференций мучаште районысо Тӱвыра пӧртын фойештыже фотосессийым эртарыме.