У тунемме идалык тўналын

Теве у тунемме идалыкат тўнале. Районысо школвлак йоча-влаклан уэшын шке омсаштым почыч. Мишкан селасе 2 №-ан полилингвальный шуко функциян школат йоча-влакым алал кумылын вашлийын. Тушто тений 407 йоча тунемаш тўналеш. Тений тиде школышто латикымше классыш 12 тунемше толын. 1 классыш тунемаш 31 йоча пурен. Нуно тенийсе 1 сентябрь пайремым нигунам мондышаш огытыл. Изи йоча-влакым кок класслан шелме. 1 «а» классым Наталья Хурматуллина туныкташ тўналеш, 1 «б» классым – Вероника Легостаева. Торжественный линейка тўналмеке, Россий Федерацийын государственный флагшым нєлталаш чапым 11 классыште тунемше, отличник, безопасность да шочмо элым аралымашын негызше дене всероссийский олимпиадын призёржо, «КРИТ-2025» конкурсышто «Компьютерная анимация» номинацийыштыже сеныше, «Тулсавыш 2.0» всероссийский военно-патриотический модмашын муниципальный этапыштыже се‰ыше Денис Акбулдинлан пуымо, Башкортостан Республикын флагшым нєлталаш – 11 классыште тунемше, отличница, пошкырт йылме дене тунемше-влак кокласе всероссийский олимпиадын муниципальный этапыштыже сеныше, руш йылме да литератур дене олимпиаде-влакын призёржо, «Шочмо кундемын пўртўсшє» сўрет конкурсын, КРИТ-2025 информационный технологий конкурсын призёржо Алсу Галямовалан. Флаг-влакым нєлталмеке, Россий Федерацийын да Башкортостан Республикын гимнышт йонгалтыныт. Торжественный линейкым салам шомак дене полилингвальный школ директор Станислав Хазиев почын. Тудо туныктышо, тунемше да ача-ава-влакым Шинчымаш кече дене саламлен, туныктышо-влаклан кумылын туныкташ, йоча-влаклан тыршен тунемаш да ача-ава-влаклан чытышан лияш тыланен. - Пагалыме туныктышо-влак, чылаландат алал кумылан лияш да пашаштыда сенымашыш шуаш, чытымашым, тунемше-влак могырчын йєратымашым да пагалымашым, ачаава-влак могырчын пашадам аклымым тыланем, - каласен Станислав Валерьевич. – Мый раш палем: школыштына эн сай, мунло да опытан туныктышо-влак пашам ыштат да икте-весыштлан эре полшен шогат. Коллективлан лач татун пашам ыштымаш сай результатым ончыкташ полша. Пытартыш ийысе ЕГЭ-н результатше почеш Юлий Аптиев физика дене 98 баллым поген, Сергей Попов туныктен, профильный математика дене – 96 баллым, Эльвира Васюткина туныктен, информатика дене – 93 баллым, Евгений Ишпахтин туныктен. Биологий, химий, математика, руш йылме дене тунемшына-влак 80 утла балл дене погеныт. Выпускникна-влак чыланат могай-гынат ВУЗ-ышко тунемаш пуреныт. Ныл туныктышына – Венера Муртазина, Лилия Хасанова, Надежда Салиева, Айгуль Сахаутдинова - Башкортостан Республикын полилингвальный направлений почеш туныктымаште 100 эн сай туныктышо радамыш пурен, нуно 50 тўжем тенгеаш Грант дене палемдалтыт. Мишкан район МР администраций лўм дене тунемше, туныктышо да ача-ава-влакым администрацийын пашажым виктарыше Ринат Сафин саламлен. Тудын деч вара мутым Мишкан районысо образований отделын представительже – методист Ирина Кусюкбаевалан пуымо. - Ондак икымше классышке тунемаш пурышо-влакым саламлем, - каласен Ирина Геннадиевна. – Тыланда таче икымше гана икымше онгыр йўк йонгалтеш. Тидын дене куштылго огыл, но онай да тўрлє событийлан поян илышда тўналеш. А кугурак класслаште тунемше-влаклан ончыкылык илышыштым рашемдыше идалык икымше ошкылым ышта. Салам шомак-влак деч вара, поро йўла почеш, икымше классышке тунемаш толшо-влак выступатленыт. Изи ўдыр да эрге-влак шочмо элна да школышто тунемме нерген почеламут-влакым тыршен лудыныт. Пайрем мероприятийым латикымше классыште тунемше-влак Александра Савельева ден Герман Ямиданов вўденыт. Нуно изи тунемше-влаклан тыгай сугынь шомакым каласеныт: - Те пеш онай полилингвальный школышко тунемаш толында. Ончыкыжым тудо тендан кокымшо пєртда лиеш. Ме тендам шкенан келшен илыше ешышкына налына. А полилингвальность мо тугайым ончыктена... Тылеч вара кугурак класслаште тунемше-влак англичанла да татарла муреныт, марла куштеныт. Онай концерт номер-влак деч вара тунемше-влак туныктышо-влаклан пеледаш аршаш-влакым кучыктеныт. Тидын деч вара икымше онгыр йўк йонгалтын. Тудым пуаш чапым 11 классыште тунемше, отличница, руш йылме да математика дене Ю. А. Гагаринын кубокшылан тунемше-влак кокласе виш межвузовский олимпиадын пытартыш этапшын призёржо, руш йылме, информатика, англичан йылме дене тунемше-влак кокласе всероссийский олимпиаде-влакын муницпальный этапшын сенышыже да призёржо, КРИТ конкурсын призёржо, Республиканский IX математический виш турнирын кокымшо степенян дипломантше Кира Кусюкбаевалан да икымше классыште тунемше Елисей Муратбаевлан пуымо. Тылеч вара икымше классышке толшо тунемше-влакым икымше урокышкышт ужатыме. Тыге йоча-влаклан у тунемме идалык тўналын.

Светлана ТОЙМУРЗИНА