Школ тунемше-влакым вашлияш ямде

Кенеж шумеке, тунемше-влаклан куанле жап тўналеш – эн кужу каникул. Но педагогический коллектив ты жапыштат ок кане. Нунылан школым у тунемме ийлан ямдылаш кўлеш. Тыште чылажымат йодмаш дене келшышын ыштыман – кабинет-влакат ару лийшаш улыт, безопасность нергенат мондыман огыл... Мемнан коллективна чыла задачым кўлеш семын шуктен. Школнам посна комиссий 13 августышто текшырен – кугу ситыдымашым мумо огыл. Икманаш, Йылыш ялысе школ тунемше-влакым вашлияш ямде улеш! Тений школышкына 69 тунемше тунемаш толшаш, эше 5 йоча ГКП группышто тунемаш тўналеш. Нуным чылаже 15 туныктышо вашлиеш. Колективна ваш келшен ила да ик ой дене пашам ышта, чыланат школна йоча-влакын кокымшо пєртышт лийже манын тыршат. Школышто педагогический пашан ветеранже-влакат, самырык туныктышо-влакат улыт. 40 ий утла йоча-влаклан математикым высший категориян туныктышо Раиса Алексеевна Аймурзина туныкта. Тудо жапыштыже школ директор лийын, кызыт директорын заместительже улеш. Руш йылме да литературым 30 ий утла Жанна Дмитриевна Яметова туныкта, тынарак жап школышто йот йылмым туныктышо Наталья Байдугановна Акиева тырша. Пытартыш 5-6 ийыште паша коллектив палын самырыкемын. Кугу опытан туныктышо-влакым самырык, но чолга да чулым специалист-влак вашталтеныт. Нунын опытышт шагалрак гынат, кызытсе туныктымо системым сайынрак палат. Пашашт ушнен толеш. Тидым выпускникна-влак рашемдат – нунын кокла гыч шукын престижный вузлашке тунемаш пурат. Туныктышо-влак ондак тунемше-влакым предметыштым тунемаш кумыландаш тыршат. Профессиональный ориентацийымат єрдыжеш огыт кодо, тидын шотышто тўрлє мероприятий-влак эртат. Тидым ышташ тыгак тўрлє олимпиада ден конкурс-влак полшат. Мемнан школна «Сылнылык сандалыкым утара» девиз почеш пашам ышта. Тунемме заведенийна 1993 ий гыч тўп общеобразовательный статусым налын. Ты жап гыч ме художественный самодеятельность дене смотрлаште, спортивный мероприятийлаште да тўрлє конкурслаште чулымын участвоватлена да призовой вер-влакым налына. Сочинений конкурслаштат призовой вер-влакым налын шогена. Нине сенымашна-влак туныктышына-влакын пашам тыршен ыштымыштым рашемдат. Поснак нине туныктышо-влакым палемден кодыман: Ж. А. Апкаликова, М. А. Аплекова, Р. В. Саликаева, А. Э. Зайнетдинова, Л. Я. Хизяева, Н. Б. Акиева, Ж. Д. Яметова, М. Г. Иркабаева, Р. А. Аймурзина. Школышто тўрлє сынан кружок-влак, волейбол дене секций пашам ыштат. Секцийын пашажым Фанус Кадимович Вафиев вўда. Тунемшына-влак кумылын спортивный ориентирований дене занятийлашке коштыт, нуным Елисей Яковлевич Адылшин ямдыла. Икманаш, Йылыш ялысе школ пашажым тыршен да сайын шукта. Коллектив пашаштыже ятыр ияш опытланат, туныктымо у йєн-влакланат энертен пашам ышта. Тыге тўрлє йєным кучылтмаш сай лектышым пуа да тунемшына-влаклан шинчымашым погаш да ончыкыжым илышыште шке верыштым муаш йєным ышта.

Алиса ЗАЙНЕТДИНОВА, Йылыш ялысе школышто англичан йылмым туныктышо.