Сай школ директор

- Кемий школ – мыйын кугу ешем, тудо мылам, шкенжын выпускницыжлан, илышыш путевкым пуэн. Мый шкемын туныктышем-влаклан тау мутым ойлем. Нуно мыйым шонаш да илаш туныктеныт, туныктышо лияш кумыланденыт, тиде пашаште мылам сай пример лийыныт. Школыштына шкеныштын пашаштым йєратыше педагог-влак пашам ыштат, тунемшына-влак тыршышан улыт, коллективна татун ила. Кунам ме пашалан пырля пижына, чыла нелылыкымат вашке сенена. Туныктышо лиймемлан, тыгай виян туныктышо-влак дене пашам ыштымемлан пўрымашемлан тауштен илем, - ойла Лиана Фанавиевна. Школ директор семын, Лиана Фанавиевна ялын пўрымашыже верчынат тургыжлана. А ситыдымаш-влак ятыр улыт: паша укелык, самырык-влак олалашке кайымаш, жапым пайдалын да онайын эртараш вер да йєн укелык. Социальный инфраструктурат саемдымым йодеш. Нине ситыдымаш-влак школын пашаж дене кылдалтше вес ситыдымашым шочыктат – тунемше-влакын чотышт шагалемеш. Тыге районыштына ятыр школ петыралтын. Но Кемий изи ял огыл, школлан кызытеш лўдыкшє уке. Ачаава-влак могырчынат полшаш тыршымаш шижылтеш. Нуно школышко чўчкыдын пурен лектыт, икшывышт кузе тунеммым йодаш веле огыл, тыгак, полыш кўлеш гын, полшаш сєрат, школышто эртыше мероприятийлаште кумылын участвоватлат. - Ача-ава-влакын тауштымашышт да полшаш сєрымышт кумылым нєлта, йоча-влакын тыршен тунеммышт, туныктышо-влакым пагалымашышт пашам у вий дене ышташ тарата, - ойла директор. Ача-ава-влак могырчын тыгай отношенийым, конешне, сулен налын моштыман. Лиана Фанавиевна тидым ыштен кертын. Тудо тыглай туныктышо гычын уста да сай вуйлатыше марте кушкын. Тидын верч жапше ден вийжым чаманен огыл. Усталыкшым эре пўсемдаш тыршен. Лиана Фанавиевна шкеж дечынат, туныктышо-влак дечынат пенгыдын йодшан улеш, школ илышым чыла могырчынат сайын пала, тыршен шога. Но, полыш кўлеш гын, туныктышо-влакланат, ачаава-влакланат, тунемше-влакланат полшаш эре ямде улеш. Директорлан школын илышыже – шкенжын илышыж дене иктак, манаш лиеш. Пашаштыже Лиана Фанавиевна ваш келшен илыше коллективлан энерта. Тачысе кечылан школышто 22 туныктышо пашам ышта. Директор кугу верым педагог-влакын квалификацийыштлан ойыра, туныктышо-влакым кушкаш кумыланден шога. Ялысе школ – ялын шўмжє. Тушто илыш шолеш, культурный мероприятий-влак эртат. Ончыкылык тукым илаш тунемеш. Тидлан кєра школ директор ялыште кугу рольым модеш. Ялын ончыкылыкшо тудын дечын кугун шога. Тидлан кєра школ директорна Лиана Фанавиевналан коллективнам ончыко сайын вўден нангаяш тыланена. Ме школышто чыланат тунемшына-влакым кугу илышлан туныктен лукташ тыршена. Тек мемнан тиде пашана эре ушнен толеш. Выпускникна-влак шукын тўрлє вузлаште тунемыт, тугеже ме арам она тырше. Тыште школ директорынат надырже кугу. Мемнам ончылнына тўрлє событийлан поян тунемме идалык-влак вучат. Лиана Фанавиевналан профессиональный пашаштыже шуко у сенымашым тыланем, тек коллективна ончыкыжымат икоян да пенгыде лиеш да тунемшына-влак тауштен гына шогат!

Н. БАЙБУЛАТОВА, директорын туныктымо-воспитатлыме паша шотышто заместительже.