Чолга туныктышо да мер пашаен

Илышыште шкеныштын верыштым мушо, йєратыме пашаштым ыштыше ен-влак чынжымак пиалан улыт. Шке пашаштым уло кумылын йєратыше туныктышо-влак, очыни, эше пиаланрак улыт. Вет нуно йоча-влак дене пашам ыштат. Нунылан шинчымашым пуат, поро чонан, чын айдеме лияш туныктат. Икманаш, нуным ончыкылык илышлан ямдылат. А йоча-влакын ончыкылыкышт утларакшым кугыен-влак дечын шога – ача-ава да туныктышо-влак дечын. Нуно икшывым пырля да ик ой дене туныктат гын, ончыкылыкшо нерген тургыжланышаш уке. Эльвира Алпаева шке пашаштым кумылын ыштыше туныктышо-влак кокла гыч иктыже. Тудо Ардаш ялысе школын филиалже - Лепешкан ялысе тўналтыш школышто кўчык жап лийме группын воспитательже улеш. Эльвира Байрамовна образований сферыште уже 39 ий ышта, 34 ий тўналтыш класслаште туныктен, 5 ий дошкольный группын воспитательже улеш. 1986 ийыште, Благовещенск оласе педучилищым тунем пытарымеке, тудо Шаран районышто туныкташ тўналын. 1987 ийыште Мишкан районышко куснен. Шаде Шогертен ялысе тўналтыш школ директор да туныктышо лийын. 1990 ий гыч Лепешкан ялысе тўналтыш школышто туныкташ тўналын, 2008-2018 ийлаште туныктышо да школ вуйлатыше лийын. Эльвира Байрамовна сай туныктышо веле огыл, тыгак чолга мер пашаен улеш. Тудын деч посна ялыште ик мероприятият ок эрте. Тидлан кєра ял калык тудым моткоч пагала да пашажым акла. Эльвира Байрамовнан тунемшыже-влак тудым ўмырышт мучко шарнен илат, чўчкыдын канашым йодын толыт. Туныктышылан тиде пиал огыл мо? Тудлан тунемшыже-влакын тауштымашышт эре эн шерге. Эльвира Байрамовнан выпускникше-влак коклаште шукын илышыште кугу сенымашыш шуыныт, тўрлє пашаште сай специалист лийыныт. Нунын коклаште инженер, военный, туныктышо, медицина пашаен, строитель, нефтяник-влак улыт. Но тўнжє, очыни, пашаштышт огыл, а поро шўмыштышт. Нуно чыланат поро кумылан, шонымашышкышт шуаш тыршышан, чыным йєратыше улыт. Тидлан чылаштымат туныктышышт туныктен. Шочмо элна верч кредалше тунемшыже-влакат улыт. Вет Эльвира Байрамовна йоча-влакым сай айдеме лияш веле огыл, тыгак шочмо элнам кумылын йєраташ туныкта.

О. АПТЫКАЕВА.