Уста улыт, йоча-влакым йєратат»

Тыгай конкурсышто туныктышо-влак шке мастарлыкыштым, йоча-влакым йєратымыштым тўрыснек почын пуат. Кугу опытан туныктышо-влак дене пырля самырык туныктышо-влакын танасымашке ушнымышт куандара. Нуно у шўлышым пуртат. «Идалыкын туныктышыжо» конкурс шукертак профессиональный мастарлыкым аклыше пайремышке савырнен. Тений ты конкурсын муниципальный этапыштыже участник-влаклан ныл этапым эрташ кўлын. Кок этапше - «Конкурсный урок» да «Блицтурнир» - районысо тўрлє школлаште эртен. Финалыште конкурсант-влак «Визитный карточкым» да «Мастер-классым» ончыктеныт. Конкурсный мероприятий 4 апрельыште Марий историй да тўвыра рўдерыште эртен. Тушто финалыш лекше вич туныктышо участвоватлен: Мишкан селасе Ф. Буляков лўмеш 1 №-ан лицейыште тўналтыш класслаште туныктышо Татьяна Петрова, Нерге кыдалаш школышто руш йылмым да литературым туныктышо Лиана Гареева, Кўрзе кыдалаш школышто географийым туныктышо Юрий Ямурзин, Чорай селасе Я. Ялкайн лўмеш марий гимназийыште технологийым туныктышо Елена Юзиева, Мишкан селасе 2 №-ан полилингвальный шуко профилян школышто англичан йылмым туныктышо Анна Иманова. Нунын паша стажышт тўрлє, квалификационный категорийышт денат ойыртемалтыт, но чылаштымат шке пашаштым, профессийыштым йєратымаш ушен шога. Нунын педагогический кредо манмыштат икгайрак: «Мом йєратеда, тудым ыштыза. Мом ыштеда, тудым йєратыза», «Весым туныкташ шкалан тунемман, весым воспитатлаш шке деч тўналман, весым вияндаш, шкалан эре виянман». - Те чылан сеныше улыда, вет шке шинчымашдам, моштымашдам, профессионализмдам ончыкташ жапым да вийым муында. Шумо кўкшытеш нигунам чарнен ида шогал, ончыланда у задачым шындыза. Кажныда кушкын толшо тукымым воспитатлымаште педагогын вержым шке семынже ужеш, но ик умылымашда чыладан икгай - йочам, ойырен налме профессийым йєратыде шочмо элнан чын гражданинжым, чын айдемым кушташ огеш лий, - каласен район администраций вуйлатышын икымше заместительже Лариса Александрова. «2025 ийысе эн сай туныктышо» конкурс чылалан - конкурсантланат, ончышыланат, жюриланат пеш поро шарнымашым коден. Кажне конкурс жюрилан туныктышым у кўкшыт гыч ончалаш таратен. Участник-влак чылан моткоч уста, талантан, методически шуаралтше да икте-весышт деч ойыртемалтше лийыныт. Сандене жюрилан сай-влак кокла гыч эн сайжым ойыраш куштылго лийын огыл. Конкурсант-влак чыла заданийым сайын шуктеныт, шке педагогический мастарлыкыштым тўрыс почын ончыктеныт.Творческий конкурслаште туныктышо-влаклан шке воспитанникышт да пашам пырля ыштыше коллегышт-влак полшеныт. Чыла конкурсный текшырымаш деч вара сеныше да призер-влак рашемыныт. «2025 ийысе эн сай туныктышо» лўмым Татьяна Петрова сулен налын. Призер радамыш Лиана Гареева ден Анна Иманова лектыныт. «Историйым аралыше» номинацийыште Юрий Ямурзин сенен, «Почеш вўден кайыше» номинацийыште Елена Юзиева палемдалтын. «Идалыкын туныктышыжо» всероссийский конкурсын муниципальный этапыштыже сеныше Мишкан районын чапшым республиканский этапыште аралаш тўналеш. Районысо образований пашаен-влак профсоюз организацийын председательже Алена Килинбаева участник-влакым конкурсын муниципальный этапше эртыме дене саламлен, сайын выступатлымыштлан, мастарлыкыштлан тауштен да умбакыжат профессионально кушкаш, а сенышылан региональный этапыште сайын выступатлаш тыланен. - Ий гыч ийыш конкурс эн сай туныктышо-влакым рашемдаш полша. Тудын историйже - тиде образовательный учрежденийласе туныктышо-влакын сенымашыш шумо историйышт. Конкурс кажне туныктышын профессиональный мастарлыкшым, тунемше-влакым кумыланден моштымыштым почын пуа. Йочам воспитатлымаште туныктышын рольжым аклаш неле. Йоча-влак утларакшым шке туныктышышт гай лияш тыршат, сандене кажне педагог тунемше-влаклан пример лийшаш, - палемден жюри председатель, образований отделын вуйлатышыже Сергей Александров.

Венера АГЛЯМОВА