Йодыш-вашмут 1

Йодыш-вашмут

1. Корным тӧрлымӧ да яллашке газым пуртымо шотышто йодышлан Тымбай сельсовет вуйлатыше Дмитрий Янгубаев вашештен:

- Чын, Кугу Соказа гыч Измар марте шуйнышо Тымбай-Токтар-Измар корным юватылде олмыктыман. Чаманаш кодеш, 2019 ийлан тудым асфальт дене вакшаш окса уке. 2019 ийын кумшо кварталыштыже корным гравий да карьерный материал дене вакшаш палемдыме. Асфальтым вакшаш йӧн ешартыш окса пурымеке гына лиеш.

Газым пуртымо шотышто. «Газпром газораспределение Уфа» ПАО-н Пӱрӧ оласе филиалже 2020 ийыште Мишкан районысо ял-влакым газифицироватлыме шотышто инвестиционный программым ямдыла, программышке районысо Тымбай, Измар, У Тымбай ял-влакат пурталтыныт.

2. Вес йодышым Мишкан район муниципальный район администрацийлан пуымо:

- Тошто Атнагул ялыште шўгарлам шарынешт. Ял калык тургыжлана – вет тудым ял могырко кумдарташ палемдыме, а тушто пакча-влак. Тидын годым ял воктене ятыр яра пасу уло. Шӱгарлалан у верым ойыраш ок лий мо?

Ял калыкым тыгак уремым волгалтарыме шотышто йодыш тургыжландара. Йӱдым уремыш лектат гын, йомат – нимо ок кой.

Серышлан Мавлют сельсовет сельский поселений вуйлатыше Динар Фазылбеков вашештен:

- Шӱгарлам ял могырко она кумдарте. Калык погынымаште шўгарла печым спонсор окса полшымо дене олмыкташ палемдыме. Июльын икымше пелыштыже эше ик калык погынымашым эртарена, тушто калык у шӱгарлалан верым шке ойырен налеш.

Уремым волгалтарыме шотышто. Кызыт ялым 8 панар волгалтара. 2020 ийыште эше 10 панарым вераҥдаш палемдыме, 2022 ийыште – эше визытым.

Фирдаус КАДИКОВА ямдылен.