Паша визит дене

Паша визит дене

Районышто тудо тӱрлӧ собственностян икмыняр озанлыкыш миен, ял озанлык пашаеҥ-влак дене вашлийын, шошо ага пашан сайын мийымыже нерген палемден. Ял озанлык министр тенийсе шошо ага ял калыклан черетан экзамен улеш манын.

Тений икияш культурым ӱяҥдышым ешарен ўдат. Шошо ага пашам кӱчык жапыште эртарен олтышашлан ял озанлык отдел да мланде пашаеҥ-влаклан трактор ден прицепной инвентарь-влакым ямдылымаште кугу пашам шукташ верештын.

Районышто урлыкаш пырчым ситышын ямдылыме, чылаже 1400 тонн лийын. Министрын мутшо почеш, районысо мланде

пашаеҥ-влакын кушкылым аралыме средствашт, ГСМ да шапаш ужаш ситышын уло. Тракторный паркын технический ямдылыкше 100 процент. Районысо мланде пашаеҥ-влак кокияшым ӱдымаште ойыртемалтыныт.

Шыжым ӱден кодымо культура телым сайын лектын. Кокияш культура 2 тӱжем гектарым айла, икияшым 7546 гектарыште ӱдыман. Такыр пасулан 3 тӱжем гектарым кодымо. Чӱчкыдын лийше йӱр пашалан чаракым ышташ тырша гынат, ял озанлык пашаеҥ-влак шошо агам кӱчык жапыште эртарен колташ шонат.

Ильшат Ильдусович «Т. Ш. Кштаев» КФХ-н пасуштыжо лийын. Тиде озанлыкыште пытартыш ийлаште мланде пашам эртарыме качествым ятырлан саемдыме. Республикысе ял озанлык министр верысе опытан фармацевт Владимир Шамшиевын эмлык шудо-влакым ямдылыме пашаж дене палыме лийын. Фермерын эмлык сырьем аралыме складлаштыже, сушилкыште, фасоватлыме цехыште лийын.

БР премьер-министр ты-гак мӱкшызӧ В. Зайниевын мӱкш пакчашкыже миен. Вениамин Николаевич мӱкш отарыштыже чылт изи олам ыштен, тушто кажне метр мландыже таза илыш-йӱлам кучымашке виктаралтын.

Министр паша визитшым «Центральная» МТС-ын Арзамат ял воктенсе пасушто шуктымо пашажым ончымо дене мучашлен. Варажым тудо шке корныжым пошкудо Караидель районыш виктарен. Ял озанлык министрым район мучко район администраций вуйлатыше П. Трапезников ужатен кондыштын.

В. КОНДОГИН.