Мланде пашаеҥ-влак огыт лӱд

Мланде пашаеҥ-влак огыт лӱд

Коронавирус лӱдыкта гынат, районысо мланде пашаеҥ-влак эр гыч кас марте шошо агам эртарат. «Ик шошо кече идалыкым пукша» - таче нуно тыгай девиз дене пашам ыштат. Вик каласена, пашашт ушнен толеш.

Ял озанлык отделын тӱҥ агрономжо Р. Бариевын мутшо почеш, мланде пашаеҥ-влак кажне кечым пайдалын кучылташ тыршат. Районышто икияшым 6 тӱжем 700 гектарыште ӱдымӧ, икияш пырчан культурым - 4 тӱжем 600 гектарыште вераҥдыме, ӱян культурым - 790 гектарыште. Кызыт вара шушо культурым (шемшыдаҥым, кукурузым, икияш шудым) ӱдат.

Ӱдымаште «Васюткин С. Ю.», «Владимиров Э. И.», «Ильтубаева М. С.», «Кштаев С. Ш.», «Изибаев В. А.», «Родник Т. Г.» крестьян-фермер озанлык-влак, агропромышленный колледж ончылно улыт. «Центральная» МТС, Ленин лӱмеш колхоз шошо ага пашам мучашке лишемдат.

Районысо чыла озанлыкыште кылмаш куралме паша мия, кушкылым шӱкшудо деч аралаш гербицид шупшыкталтеш. Тенийсе игече шукияш шудылан кушкаш пеш келшыше. Игече шокшо, коклан-коклан йӱр йӱрын кая. Вашке озанлык-влак кормам ямдылаш лектыт.

7-8 июньышто районный комиссий ӱдымӧ пасулам ончаш лектеш.

Венера АГЛЯМОВА.