Келшымаш
-10 °С
Лум
Все новости
Марий йӱла
12 Ӱярня 2021, 09:27

Карт-влак погыненыт

10 мартыште Мишкан селасе Марий историй да тўвыра рўдерыште онаеҥ-влак «Марий йўлан поянлыкше да научно-образовательный потенциалже» тема почеш «йыргешке ўстелым» эртареныт.

Карт-влак погыненыт
Каҥашымашым тўҥалме деч ончыч Марий историй да культура рўдерын вўдышӧ методистше Алексей Ибулаев уна-влаклан
уэмдыме зданий мучко изи экскурсийым эртарен – верысе интерактивный музейым, кидпаша мастерскойым, актовый залым да рўдерысе моло кабинет-влакым ончыктен. Экскурсий деч вара чыланат актовый залыште йыргешке ўстел йыр погыненыт.
Вашлиймашке карт да марий йўла тиште вуйлатыше-влак деч посна Мишкан район МР администраций вуйлатышын заместительже Л. Александрова ден Башкирский Государственный университетын Пўрӧ филиалжын пашаеҥже, психологий наука кандидат, доцент О. Батуринам ўжмӧ. «Йыргешке ўстел», поро марий йўла почеш, удылмо да сугынь шомак гыч тўҥалын. Тылеч вара мутым Л. Александровалан пуымо. Людмила Геннадиевна погынышо-влакым шокшын саламлен да вашлиймаш лектышан лийже манын тыланен.
Л. Александрова деч вара Пошкырт кундемын тўҥ онаеҥже Г. Пастиев выступатлен. Тудо марий йўлан кўлешлыкше да тудым аралаш да вияҥдаш кўлмӧ нерген ойлен. Тудын шомакше деч вара Йошкар-Ола гыч И. Степанован Пошкырт кундемысе карт-влаклан лўмдымӧ видеообращенийжым ончымо.
Умбакыже каҥашымаш Пўрӧ олаште БГУ-н Пўрӧ оласе филиалже пелен марий йўлалан туныктымо шотышто курсым почмо дене кылдалтын лийын. Сандене мутым О. Батуриналан пуымо. Оксана Сергеевна тиде паша нерген раш умылтарен. Курсым почмаш документ-влакым ямдылыме дечын шога. Чыла сай лиеш гын, кагаз паша шыже марте пытаралтшаш улеш.
Тылеч вара марий календарь нерген мутланыме. Марий календарь шотышто каҥашымаш апрель мучаште Йошкар Олаштат эртышаш. Ӱжмаш уже толын. Тидлан кӧра тиде погынымашке делегат-влакым сайлыме да тушко кайыме деч ончыч ончыкылык календарьым мучаш марте рашемдашлан апрельыште уэшын погынымашым эртараш кутырен келшыме.
Икманаш, вашлиймаш пайдалын эртен. Ончыкылык погынымаш-влакат тыгак сайын эртат гын, марий йўла вияҥын гына
шогаш тўҥалеш.
Эсен ЭЛАЙ.