Кочамын ойлымыжым шарналтен…

Кочамын ойлымыжым шарналтен…

Ямле кеҥеж кечын кочам Тошто Эшымыш Кутлияр шольыж деке унала каен. Айват миен шуын, шольыж ден шешкыже вученыт: ўстелыш сийым погеныт. Нуно чон почын ойласат, чайым йўыт. Кас шуэш, малаш возыт. Эрдене кочам каяш погына, корно мўндыр гына. Эркын ошкылеш, чодырам лекмеке, иктаж витле метр наре каят, кум корнывожым ужеш. Ӧрын онча. «Кушто улам?» - шоналта. Каналташ шинчеш. Кенета ачажын ойлымыжо ушышкыжо пура.

Ожно ачаже чодыраш кукшо пу погаш каен, поген ситаренат, каяш тарванен, а кушко кая ок пале: корным йомдарен. Шинчын, каналтен. Вара кок йолысо йыдалжымат кудашын (шола могыр йолжым кудашеш, йол воктекше пышта, пурла йолжым кудашеш, йол воктекше пышта). А вара вашталтен чия: шола йолчиемжым пурлашке, пурлажым – шолашке. Кынел шогалеш, онча – корно коеш. Эркын мӧҥгыжӧ пӧртылеш.

Кочамат ачаж гаяк ышта: шола йолысо йыдалжым пурлаш чия, а пурлажым – шолашке. Кынел шогалеш, йырваш ончалеш, кушто улмыжым шарналтен налеш, кенета шинчажлан корно койын колта. Тыге кочам корным муэш, эркын ялыш толын пура. «Вот вет, илышыште тыгай туткарымат ужаш логалын», - ойлен кочам.

Антонида ИГНАЕВА, Ардаш ял.