+19 °С
Ясно
Марий йӱла
31 Декабря 2020, 21:00
Йомакеш веле кодын
Йомакеш веле кодын
Йомакеш веле кодын
Ятыр ожно пич кожлаште,
Тӱрлӧ ер-эҥер серлаште,
Кушто ятыр кол ден янлык,
Эркынлен илен мер калык.
Ик илем гыч вес илемыш,
Да кундем гычын кундемыш,
Шыматен лай олык-нурым,
Шып йоҥгалтын марий муро.
Телым сип кожла оргажыш
Коштын ош марий сонарыш.
А кеҥежым пасулаште
Жапше йомын нур пашаште.
Тыгерак илен кугезе,
Чулым, лӱддымӧ, полмезе,
Йӧратен куэ ден тумым,
Пагален Ош Поро Юмым,
Кӧн пашаже – поро сомыл,
Юмо тудым коден огыл:
Пасумландыже улаҥын,
Орлык чер дене кораҥын.
Мӱкш ден вольыкшо шукемын,
Молыжат чыла саемын.
Ияжат тыгайым шотыш
Налын, шылын лўдын рожыш.
Каласаш кӱлеш вет, ожно
Екысукыжо да можо
Шуко лийыныт моткочын,
Калыклан конденыт кочым.
Коштыныт йырваш кашакын,
Лӱдыкташ тӧчен еҥ-влакым.
Марий пӧрт йыр ожно водын
Кас ия шып пӧрдын, модын.
Коштыныт кожла сип мучко
Тӱрлӧ янлык ден вий шучко:
Таргылтыш, Овда да моло,
Кеч сава ден нуным соло...
Чояжат пернен, окмакшат,
Лийын порыжат, осалжат,
Лӱдыкшӧ сынан, йомартле,
Шыдештшан моткоч, тыматле...
Шӱкшондал, кӧрвеч гыч лектын,
Коштын кертын ожно эркын.
Кӧ кум ӱпшым тудын кӱрлын,
Йодын кертын погым тўрлым.
Суртоза ончен пӧрт-суртым,
Но коклан трук луктын кутым.
А Вӱтаоза тыгодым,
Шӱльым, шурным шолышт толын.
Йӧратен чот ола ожым –
Тудын верч пуен шке чонжым.
Эр шумеш пунен оржажым
Шке йӧратыме «чомажын».
А Капка орол йот еҥым
Вашлиялын сарзе семын,
Кудыводыж сурт-оралтым
Аарален, пуэн куатым.
Тыгерак илен айдеме
Ожно тӱрлӧ водыж дене.
Но пернен коклан осалжат,
Шыдешкен трук Шӱкшондалжат.
Вӱдия эҥер воктене
Еҥым эҥырен кастене.
Албастаже шерын ялым –
Коштын йышт кычал окмакым.
Южгунам, кожла гыч лектын,
Шӱралят трук толын кертын.
Кычкырен каен ял мучко.
Йӱкшӧ шучко! Шучкат шучко!
Шошым гын, вашкӱзым налын,
Пырыс, комбыш савырналын,
Коштын лӱдыкшӧ Пӱчкедыш –
Тыныс илышым локтедыш.
А коклан, йӱлен каваште,
Чоҥештен Вувер кожлашке...
Шӱкшондал, ияже-можо
Шуко лийыныт вет ожно.
Но кеч толашеныт кечын,
Лӱдын огыл нунын дечын
Патыр тукым марий калык,
Но шыпак эрталын пагыт...
Эркын ятырже мондалтын,
Порсын шӱртыла кукталтын...
А варажым, илен-толын
Чылт йомакеш веле кодын.
Эсен ЭЛАЙ.
