Йўштӧ кугызанам калык жапла

Йўштӧ кугызанам калык жапла

ТурСтат аналитика агентствын палемдымыж почеш, Марий Йўштӧ кугыза Российысе эн чот жаплыме 10 Йўштӧ кугыза радамышке логалын

Агентство пашаеҥ-влак, жаплымашым турист-влакын Йўштӧ кугыза-влакын илыме верышкышт миен коштмым терген рашемденыт.

Текшырымаш почеш икымше верыш Великий Устюг ола гыч руш Дед Мороз лектын. Турист-влак тушко эн шуко мият. Кокымшо верым Татарстан гыч Кыш Бабай налын. Тудо Яна Кырлай селаште ила. Кумшо верым Карелийысе Олонец ола гыч Паккайнлан пуымо.

Нылымше ден визымше верлам Бурятий гыч Саган Убген ден Удмуртий гыч Тол Бабай налыныт.

А марий Йўштӧ кугыза ден Лумўдыр уныкаже кудымшо лийыныт. Нуно Марий Элыште илат. Резиденцийышт Шернур районысо Кукнур селаште верланен. Эн чот жаплыме 10 Йўштӧ Кугыза радамыш тыгак Мордовий гыч Якшамо Атя, Чуваший гыч Хел Мучи, ЯНАО гыч Ямал Ири, Тува гыч Соок Ирей пуреныт.

Коми калыкын Кӧдзыд Пӧльжо эн чот жаплыме 10 Йўштӧ кугыза радамыш ала-молан логалын огыл. А вет лач тудет, ожсо лўмжӧ Войпель – Йўдвел кугыза лийын, Телын пыжашыштыже – Йўдвел Уралысе Теле пыжаш курыкышто (Тельпосиз, Тельпос-Из, Тэл-Поз-Из – коми йылме гыч кусараш гын, «из» - «кў», «курык» лиеш, «поз» — «пыжаш», «тол» - «мардеж» (йўштӧ мардеж), «йўдвел мардеж») ила. Финн-угор йылмылаште «теле» шомак лач тышечын лектын да акрет жапыште йўштӧ, йўдвел мардежым ончыктен. Но, вес могырчын, тидлан ӧршаш уке. Эн сай 10 Йўштє кугызам турист-влак мийымым шотыш налын аклыме, а Тельпосиз курыкыш корно кужу да куштылго огыл.

Эше марий Йўштӧ кува мондалтме гына изишак тургыжландара. Вет марий йўлаште кажне юмын да пўртўс вийын пелашыже уло. Марий-влак Шочйол – Шорыкйол пайрем годым эре Йўштӧ кугыза ден Йўштӧ кувам вашлийыныт. Лумўдыр деч поснат, конешне, ок лий. Тугеже тудын ачаж ден аваже лийшаш улыт. Лўмышт, очыни, Поран ден Пургыж, але Поран ден Кылме. Ала лудшына-влакат чын лўмыштым рашемдаш полшат?

Эсен ЭЛАЙ.