Пырля кугезе йӱлам арален кодена

Пырля кугезе йӱлам арален кодена

Башкортостан Республикыште тыгай погынымашым эртарымаш поро йӱлашке савырнен. Вет пырля погынен гына тӱрлӧ ситыдымаш-влакым кораҥдаш, паша опыт дене пӧлалташ лиеш. Тений семинар-совещаний Краснокам районысо Арлан ялыште эртен. Тушко пагалыме уна семын кумдан палыме марий эмлызе Виталий Головин толын. Вет мероприятий «Кугезе йӱла полшымо дене таза самырык тукымым куштымаш» тема почеш эртен.

Погынымаште Краснокам районысо марий йӱла община вуйлатыше В. Шайдуллин, Янаул районысо марий йӱла община вуйлатыше Г. Пастиев, БР-се марий историй да культура рўдер вуйлатыше А. Ибулаев да моло выступатленыт.

Мероприятийыште марий кумалтыш-влакым аралыме да регистрироватлыме шотышто йодыш-влак тарваталтыныт. Пытартыш ийлаште кугезе йӱла мондалт толеш, поснак тойымо, кумытшым, шымытшым, ныллыжым, вӱредышым чӱктымаш йӱла-влак мондалтмаш тургыжландара. Ситыдымашым кораҥдаш манын, семинар-совещанийыште марий йӱла нерген брошюрым але книгам лукташ пунчалме. Материалым погымо да ямдылыме пашам Янаул районысо марий йӱла община вуйлатыше да Пошкырт кундемын кугурак картше Г. Пастиевлан ӱшанен пуымо. Тыгак республиканский кӱкшытан марий йӱла общиным ыштыме шотышто каҥашыме.

Мемнан шонымаште, тыште Мишкан район марий-влаклан чолгалыкым ончыктыман. Вет Пошкырт кундемыште Мишкан районышто эн шуко марий ила. Мишкан мландым ятыр еҥже чимарий йӱлан рӱдыжлан шотла. Ӱшаным шуктыман. Тидлан негызым уже пыштыме. Вет кодший Мишканыште «Онапу» религиозный группа пашам ышташ тӱҥалын. Моло районласе марий йӱла община-влак Марий Элысе юмыйӱла общинын филиалже улыт гын, Мишкан районысо «Онапу» религиозный группа – посна организаций улеш. А ончыкыжым тудо кушкеш да вияҥеш але лунчырга, районышто илыше кажне марий дечын шога.

Эсен ЭЛАЙ.