Марий йылмым Уфа олаштат тунемыт

Марий йылмым Уфа олаштат тунемыт

Уфа олаште марий школ-влак ончычат лийыныт. Но, ик жап ыштымеке, нуно петыралтыныт. А тиде школын ӱмыржӧ кужурак, пӱрымашыжат пиаланрак лиеш манын ӱшанена.

Рушарня школым Ганеева Валентина Вячеславовна вуйлата. Школышто тыгай предмет-влаклан туныктат: марий калыкын историйже, культурыжо да йӱлаже; марий калыкын семже да семӱзгарже-влак; ИЗО да прикладной творчество. Марий школышто историйым Любовь Салеева туныкта, марий йылмым – Светлана Микишева, хореографический искусствым – Наталья Валишина, фольклорым – Валентина Ганеева, музыкым – Олег Васильев. Марита Наумова йоча-влакым сӱретлаш да тӱрлаш туныкта.

Марий рушарня школышто тунемше ден туныктышо-влак идалык мучко тӱрлӧ конкурслаште, викторинылаште участвоватлат, школышто марий йӱла дене кылдалтше тӱрлӧ мероприятий-влак эртаралтыт. Нине мероприятийлашке чӱчкыдын «Ош Виче сем» фольклорно-этнографический ансамбль ушна.

20 январьыште Марий рушарня школышто оҥай да йомартле «Шорыкйол» пайремым эртарышна. Эн ондак Шорыкйол нерген видеоматериалым ончышна, тылеч вара «Ош Виче сем» ансамбль «Уна мурым» йоҥгалтарыш. Залым марий сурт семын сӧрастаренна ыле. Сурт оза - Орина кокай уна-влакым шокшын вашлие. Эн кугу уна-влак - марий рушарня школын тунемшыже-влак лийыч. Орина кокай нуным тамле сий дене вашлие: мелнажат, когыльыжат, пӱкштушыжат, пӱкшыжат ыльыч. Васли кува ден Васли кугызат кужу жап ышт вучыкто - йоча-влак деч вара толын пурышт. Орина кокай нунылан идалык мучко мом ыштымыжым каласкалыш, шке кид паша мастарлыкшым ончыктыш. Йоча-влак кож йыр «Изи кож» мурым мурен пӧрдыч, туныктышо-влак «Каза ден Маска» изирак сценкым модын ончыктышт. Вара чыланат тӱрлӧ модмаш дене модыч: «Вуверкува выньык», «Сокыртага», «Мешак дене куржталмаш», «Мый кӧ лиям?».

Пайрем мучаште Васли кугыза ден Васли кува тунемше-влаклан сайын тунемаш, таза, весела лияш да марий йылме ден йӱлам йӧратен да шуктен илаш тыланышт, а Орина кокайлан - тазалыкым, пиалым да вольык тӱлем.. Пайремым «Тывырдык» куштымаш дене мучашлышна.

24 январьыште Уфа оласе 1 №-ан лицейыште «Тунеммаш да творчество» XXIII научно-практический конференций эртен. Тушто Марий рушарня школын тунемшыже Вирс Ильбарисов участвоватлен – «Шочмо йылме» секцийыште «Тошто Бедей ялын историйже» тема почеш возымо пашажым арален. Жюри тудын пашажым кӱкшын аклен.

27 январьыште рушарня школышто шокшо «Коҥга пайремым» эртарыме.

Теве тыгерак ила да пашам ышта Уфа оласе марий рушарня школ.

Светлана МИКИШЕВА.