Калык календарь 7-13 январь

Калык календарь 7-13 январь

7 январь – Кече Авам жаплыме кече. Кече Ава дене пырля ӱдырамаш сынан моло юмо-влакымат жаплыман.

Кава шўдыран гын, емыж ума. Лум лумеш гын – пӱкш. Поран лектеш гын – мӱкш еш арта. Игече йӱштӧ шога гын, кеҥеж йӱштӧ лиеш.

8 январь – Илыш Шочын Авам жаплыме кече. Тиде кечын мландымбалне уло чонанлан илышым пуышо Илыш Шочын Авам жаплыман, тауштыман да телым сайын илен лекташ йодман.

Кышал пайрем. Тиде кечын кышалым шолтен кочман.

9 январь – Имньым жаплыме кече. Тиде кечын имньылан ший вӱдым йӱктыман – вӱд ведраш ший оксам але шергашым пыштыман.

Корак-влак ӱлнӧ коштыт гын, левыкта, пушеҥге парчаште шинчат гын, йӱштӧ шога. Имне пышкыра гын, игече леве лиеш, вуйжым рӱза да тургыжлана гын, поран лектеш. Йӱдым тылзе йошкарге гын, эрдене леве лиеш да вашке лум лумеш. Изи кайык-влак огыт кой гын, вашке поран тӱҥалеш.

10 январь – Кеҥежым рашемдыше кече.

Тиде кечын поран лиеш гын, кеҥеж йӱран лиеш.

11 январь – Шучко кече. Тиде кечын урем ден пасулаште тӱрлӧ кӱлдымаш, осал шўлыш да екысуко-влак коштыт. Осалым ыштен ынышт керт манын, туштым туштыман да йомакым ойлыман.

Пургыж пургыжта гын, июль йӱран лиеш.

12 январь – Ир сӧснам сонарлыме кече. Тиде кечын чодырашке ир сӧснам кучаш кайыман. Но тений, сӧсна ий толмылан кӧра, лӱяш ок лий.

Мардеж касвелчын пуа гын, эҥерыште кол шуко лиеш. Тиде кечын лум лумеш гын, кеҥеж йӱран лиеш.

13 январь – Васли водо. Тошто У ий водо.

Йӱдым игечым эскерыман: мардеж кечывалвелчын пуа гын, игече шокшо да сай лиеш; касвелчын пуа гын, идалык шӧрлан да коллан поян лиеш; эрвелчын пуа гын – емыж ума. Пушеҥгыште пӧрш шуко гын, мӱй лектыш сай лиеш.