Калык календарь 28 январь - 3 февраль

Калык календарь 28 январь - 3 февраль

28 январь – Йытын кече - тиде кечын йытын ума але уке рашемеш.

Юлызо кече – тиде кечын самырык ӱдыр-рвезе-влакым юлаш туныкташ йӧнан. Тидлан кӧра калык шекланен илен: самырык-влак тунеммышт годым еҥ-влаклан йоҥылыш тӱрлӧ эҥгекым ыштен кертыныт. Эҥгек ынже лий манын, пум перкалыман.

Кава шўдыран гын, йытын ума. Игече мардежан гын, идалык ночко лиеш.

Шӱдыр-влак чолган йўлат гын, йӱштӧ лиеш. Кечывалым поран лиеш гын, йӱдлан йӱштемда.

29 январь – Курго мыняр кодмым тергыме кече. Телылан ямдылыме курго пелыж деч шагалрак кодын гын, аныклаш тӱҥалман.

Кастене кече йошкар тӱсан гын, вес кече йӱштӧ, но ояр лиеш. Игече поранан гын, кеҥеж йӱран лиеш. Мардеж йӱдвелчын пуа гын, йӱштӧ лиеш. Игече йӱштӧ шога гын, кеҥеж шокшо да кукшо лиеш. Лум лумеш гын, шудо ума да кол сайын чӱҥгаш тӱҥалеш.

30 январь – Пел теле кече.

Пушто ӱячам кӱэштме кече. Тиде кечын, осал пурен ынже керт манын, оралтыш пурымо капка ончылым товар але сорла дене корыман.

31 январь – Локтызо-влакым поктымо кече. Тиде кечын вувер ден локтызо-влак кугу пайремышкышт погынат да тушто ушыштым йомдарымешке куштен-мурат. Нуно тидын годым тӱньык гыч суртыш пурен осалым ыштен ынышт керт манын, тудым юлыман. Сурт-оралтыште локтызо ден вувер-влак шылын ынышт код манын, вича ден клатым сола але тоя дене кырыман.

Тылзе кӧржан гын, пургыжта да йӱштӧ лиеш. Кечывалым кече ояр гын, шошо вашке толеш, поран да пургыж лийыт гын – вараш толеш.

Корак-влак тӱшкашке чумырген чоҥештылыт гын, йӱштӧ лиеш.

1 февраль – Шошо могай лийшашым рашемдыше кече.

Тиде кече могай, февраль тугай лиеш. Игече чевер гын, шошо вашке толеш. Шолап гыч вӱд йога гын, шошо вашке толшаш.

2 февраль – Кӱдырчан кече. Тиде кечын телымат кӱдырчӧ кӱдыртен кертеш. Кӱдырчӧ Юмо ден Волгенче Юмым жаплыме кече.

Игече ояр гын – шошо вашке толеш, пылан гын – март мучаште поран лиеш.

3 февраль – Тауштыме кече. Тиде кечын тыланда порым ыштыше-влакым шарналтен тауштыман. Мер Юмым - Вачӱмбал Кугу Серлагышым, Сурт Серлагышым жаплыме кече.

Тиде кечын вате ден марий, уремыш пырля лектын, пушеҥге гыч пӧршым почкалтышаш улыт.

Кава яндар гын, йӱштемда да лектыш уда лиеш. Тылзе йӱдым пыл вошт онча гын, шурно ума.