Калык календарь 22-28 апрель

Калык календарь 22-28 апрель

22 апрель – Йомшеҥерым жаплыме кече. Тиде кечын памаш вӱд деке мийыман да Йомшеҥерым жаплыман. Тылеч вара памаш вӱдым йӱман да тудын дене шӱргым мушман. Йомшеҥер калыклан шинчымашым пуышо, эмлыше да тӱрлӧ перкем пуышо юмо улеш. Ожно вес лӱмжӧ Кӱсӧ (финла Хийси – шордо сынан пӱртӱс юмо) лийын. Йомшеҥерым Кӱсӧ Юмын посна – памаш да мланде йымалсе вӱд дене кылдалтше сынжыланат шотлаш лиеш.

Памаш воктене тыгак Вӱд Оным, Вӱд Авам да Перке Юмым жаплыман. Перке Юмылан эн мотор ӱдырым ойырыман да теҥгылыш шындыман, воктекыже киндым, ате дене шӱрым, ӱмбалым да моло сийым шындыман, моло ӱдыр-влак йырже мурен куштышаш улыт. Тылеч вара, кас лишеммеке, самырык-влаклан тулотым ылыжтыман да пайремым умбакыже шуйыман.

23 апрель – Эр кечым эскерыме кече.

Тиде кечын эрдене нӧлтшӧ кече йыр тӱтыра лийшаш. Тӱтыра лиеш гын, шурно ума да идалык поян лиеш. Кава яндар гын, уэшын куралаш да ӱдаш перна маныт.

24 апрель – Вӱд ташлыме кече. Тиде кечын нимом ӱдаш да шындаш ок лий.

Тиде кечылан эҥер-влак почылтшаш улыт. Почылтын огыт шукто гын, идалык неле лиеш. Йӱр йӱреш гын, поҥго ума. Кылмыкта гын, курезе сайын кушкеш.

25 апрель - Шошо Илян кече (Шошым пайрем). Сонарзе-влакын ойышт почеш, тиде кече деч вара маска вынемышкыже йӧршын ок пуро - теле йӧршын чеверласа, да шошо вийым налеш. Мераҥ-влак тиде кече гыч кечывалым кудалышташ тӱҥалыт. Белоруссийыште южо вере маскам кынелтыме пайремым лач тиде кечын палемдат.

Кече мландым сайын ырыкта гын, лектыш ума. Йӱр йўреш гын, май тӱҥалтыш йӱран лиеш. Шертне пеледыш-мамажым шара гыншокшо лиеш. Эр йӱштӧ, а кече ояр гын, кеҥеж кукшо да лектыш уда лиеш.

26 апрель – Кечыйолшудым погымо кече. Калык ой почеш, тиде шудо ятыр чер деч эмла.

Тиде кечылан тумо лышташым колта гын, кеҥеж шокшо да чевер лиеш, тумлеге-влакат парчаштыже эше кечат гын – лектыш сай, а теле йӱштӧ лийыт. Куку кугун кычкыра гын, шокшо лиеш. Йӱд кава шӱдыран гын, шурно ума.

27 апрель – Рывыж-влак у рожым кӱнчымӧ кече. Тиде кечын, калык ой почеш, рывыж-влак тошто рожыштым кудалтен каят да у рожым кӱнчат. Тидлан кӧра нуным чара кидын кучаш лиеш.

Корак-влак мушкылтмо кече (Корак пайрем). Калык ой почеш, тиде кечын коремыште корак-влак мушкылтыт да игыштым ойырат. Шошо ага пашам тӱҥалме кече – тиде кече гыч шошо ага пашам тӱҥалман.

Корак кычкыра гын, йӱр йӱреш. Игече ночко да лавыран гын, шошо ага паша сайын эрта.

28 апрель – Мӱкш Авам жаплыме кече. Тиде кечын мӱкш ончышо-влаклан омарта-влакым пакчашке лукман але отарыште вераҥдыман. Полан ден пызле кычкым колтымо кече. Тиде кечын полан ден пызле кычкым колтат. Нунын кычкышт гыч ямдылыме эм поснак пайдале улеш. Тыгай эм пӱй корштымым сайын эмла. Пӱй коршта гын, пызле укшымат пураш лиеш.

Чаҥа-влак модыт гын, игече ояр лиеш. Кечывалым ояр, а каслан пыл-влак калкат гын, игече вашталтеш да йӱр йӱреш. Коремлаште йогышо вӱд кылма гын, кеҥежым лектыш ударак лиеш. Ӱжара йошкарге гын, але йӱр йӱреш, але мардеж лектеш.