Калык календарь 2019 ий 21-27 январь

Калык календарь 2019 ий 21-27 январь

21 январь – Йомакым йомаклыме да туштым туштымо кече. Тиде кечын Кава Юмо ден Кече Юмым жаплыман. Тыгак вӱдыш пурыман але чывылталтман да шєр кочкышым кочман.

Мардеж кечывалвел гыч пуа гын, кеҥеж кўдырчан лиеш, йӱдвел гыч пуа гын – йӱштӧ лиеш, игече ояр гын – шокшо лиеш. Пургыж пургыжта гын, корныш лекман огыл – тиде кечысе поран моткоч осаллан шотлалтеш. Тылзе ояр гын, вашке йӱштемда.

22 январь – Сурт сомылым ыштыме да мончаш пурымо - Монча кува ден Монча кугызам жаплыме кече. Тиде кечын вольыкым вӱта гыч лукман, тудетвӱташке писын савырнен пура гын, игече йӱштемда.

Игече ояр гын, кеҥежым лектыш сай лиеш. Корак ден чаҥа-влак пушеҥгын кӱшыл парчашкыже шинчыт гын, игече эшеат чот йӱштемда. Пырыс коҥгамбак кӱза гын, йӱштӧ лиеш, комдык кия гын – левыкта, кӱчшым пӱсемда – пум удыра гын – мардеж лектеш, шуко мала гын – леве лиеш, вӱдым шуко йӱеш гын, поран лектеш.

23 январь – Кеҥежым рашемдыше кече.

Шудо копнаш, пушеҥгеш пєрш возеш гын, кеҥеж йӱран да йӱштырак лиеш.

Мардеж кечывалвелчын пуа гын – кӱдырчан. Кукшо лум йога гын, кеҥеж ояр лиеш, ночко лум йога гын – йўран. Пӧрт шолап гыч вӱд йога гын, кеҥеж шокшо лиеш.

24 январь – Шошо кунам толшашым рашемдыше кече.

Осал йӱштӧ кече. Тиде кечын йўштє моткоч шучко лийын да нелын черландарен кертеш. Йӱштӧ шемым чийыше ӱдыр але ӱдырамаш сын дене кончен кертеш.

Игече леве гын, шошо вашке толеш, йӱштӧ гын – икияшым вараш ӱдаш перна. Эрдене лум лумеш, а кастене кылмыкта гын, йӱштӧ эше кужу жап шога.

25 январь – Тачанан кече. Тиде кечын Кече Юмым жаплыман, тудын лӱмеш посна киндым кӱктыман да еш дене кочман. Тиде кечын тыгак памашке вўдлан миен толман да Йомшеҥер деч тазалыкым йодман. Суртышто пуракым ӱштман да кўваршартыш-влакым почкыман.

Кава шӱдыран гын, шошо вашке толшаш. Кече яндар онча гын, кайык-влак вашке чоҥештен толыт. Лум лумеш гын, кеҥеж йӱран лиеш. Пургыжта да мардеж виян пуа гын, кеҥеж кукшо лиеш, лектыш – уда, колат ок пиж. Лектыш сай лийже манын, Кече Юмо лӱмеш киндым кӱэштман.

26 январь – Коҥга воктене шинчыме, йомакым йомаклыме да пырысым эскерыме кече.

Пырыс коҥгамбак кӱза гын, йўштӧ лиеш, комдык кия гын – левыкта, кӱчшым пӱсемда – пум удыра гын – мардеж лектеш, шуко мала гын – леве лиеш, вӱдым шуко йӱеш гын, поран лектеш.

Тылзе йыр пече коеш гын, поран лектеш. Чодыра кочыртата гын, йӱштӧ лиеш, гӱжла гын – лум лумеш да лывырта.

27 январь – Вольыкым жаплыме да вӱтам эрыктыме кече.

Тылзе йыр тӱтыра коеш гын, пургыж лектеш. Тылзе яндар огыл гын, лум лумеш. Шӱдыр-влак чолган йӱлат гын, йӱштӧ лиеш. Пушеҥгеш пӧрш возеш гын, левыкта. Эрдене корак кычкыра гын, поран але пургыж лиеш.