Калык календарь 11-17 февраль

Калык календарь 11-17 февраль

11 февраль – Кугу Илыш Шочын Юмым, Вольык Ильяным жаплыме кече. Тиде кечын Кугу Илыш Шочын Юмо, айдеме сыным налын,

вашке шошо толшашым шижтарен, чодыра, пасула-олыкла да ялла мучко шиялтышым шоктен коштеш. Йӱштӧ кува-кугыза тидлан моткоч сырат, но вашке толшаш шошым садак чактарен огыт керт. Тиде кечын Кугу Илыш Шочын Юмо ден Вольык Ильян деч вольыкым аралаш йодман, тидын годым вольык ӱмбаке изишак вўдым шыжыктыман.

Тиде кечын самырык вате-влаклан, ушкал таза лийже да сайын презылыже манын, мӱй пӱрым изишак подылман да, вольык мутым колыштшо манын, пелашыштым кӱнчыла тоя дене пералтыман. Тылеч вара ўдырамаш-влак, ӱштервоштырым, тоям, сорлам але моло арверым кучен, уремышке лекшаш улыт. Лекмеке, нунылан Юмынӱдырым ойырыман. Тудет омытам чийышаш да ял йыр шогам (але плугым) шӱдырен савырнышаш. Моло ӱдырамаш-влак почешыже ошкылшаш улыт. Тылеч вара Кугу Илыш Шочын Юмо лийше (шордо, ӱшкыж сынан карам чийыше, кидешыже йыпым кучышо еҥ) Йӱштӧ кува дене кучедалшаш да тудым сеҥышаш. Тылеч вара изирак пайремым – тӱрлӧ модмаш-влакым эртарыман.

12 февраль – Леве кече. Янлык сӱан кече. Тиде кечын чодыраште янлык-влак пайремым ышташ, мужырым кычалаш, икте-весышт дене

кучедалаш тӱҥалыт. Кугу Илыш Шочын ден Кугу Илыш Шочын Авам, Чодыра Он ден Чодыра Авам жаплыме кече. Тиде кечын шӱдырым шӱдыраш ок лий.

Мераҥ-влак сад-пакчашке толыт, а пире-влак ял воктене урмыжыт гын, йӱштӧ лиеш да теле эше кужун шуйна. Пушеҥге-влак пӧршаҥыныт гын, леве лиеш. Ӧрш вычымата гын, поран лектеш. Кече йыр кӧрж коеш гын, лектыш сай лиеш.

13 февраль – Пӧртым таргылтыш деч аралыме кече. Тиде кечын чодыра гыч таргылтыш толын кертеш. Тудлан пӧрт вуйыш кӱзен шинчаш эрыкым пуыман огыл. Кӱзен кертеш гын, пӧрт кӧргышкӧ осал мардеж пура. Кечывалым пӧрш возын гын, йӱдым лум ок лум.

14 февраль – Коля-влакым поктымо кече. Тиде кечын коля-влак клат ден пӧрт гыч лектын кайышт манын юлыман. Марлан лекдыме

ӱдыр-влаклан тиде кечын Юмо деч сай качым йодман.

Кава шӱдыран гын, шошо вараш толеш. Лум лумеш гын, шошо йӱран лиеш, тӱтыра нӧлтеш гын, игече сай лиеш. Тиде кече могай, февраль мучаш тугай лиеш.

15 февраль – Теле ден шошо вашлийме кече. Тиде кечын Кече Он ден Кече Авам жаплыман. Эрдене да кастене, кече нӧлтмӧ да шичме годым, шыманрак ончалаш, мландым ырыкташ да шошым вашкерак кондаш йодман.

Кава шӱдыран гын, шошо вашке ок тол. Игече леве гын, шошо вашке толеш, йӱштӧ але поран пургыжта гын – теле кужу жап шуйна. Шолап гыч вӱд йога гын, шыдаҥ ума, мардеж виян гын – пушеҥге емыж. Игече умыр гын, йытын сайын кушкеш.

16 февраль – Сапӱзгарым олмыктымо кече. Тиде кечын шошо ага пашалан ямдылалташ тӱҥалман – сапӱзгарым, курал-тарманым

олмыктыман. Озавате-влаклан пӧрт сомылым ыштыман, сурт водыжым сийлыман да вича озам жаплыман. Вича оза имньылан осалым

ынже ыште манын, шӱйышкыжӧ солам, ыштырым да пижым сакыман.

17 февраль – Йӱштӧ кече. Тиде кечын эре йӱштӧ лиеш але поран лектеш. Пире сӱан кече. Тиде кечын рывыж ден пире-влак сӱаным

ыштат. Рывыж-влак икте-весышт ончылно пєрдын куштат, пире-влак кертмышт семын тывырдатат. Тиде кече гыч чодырашке кошташ лӱдыкшӧ.

Кож лӱс поранлан сакалтеш, игече сай лийшашлан нӧлталалтеш.