4-10 мартлан калык календарь

4-10 мартлан калык календарь

4 март – Тӱрлӧ сийым ямдылыме кече. Тиде кечын ӱдырамаш-влаклан шуко сийым ямдылаш тыршыман – тудет ӱстембалне мыняр шуко лиеш, шурно тунаре ума.

Янлык-влакым эскерыме кече. Колшыре-влак чоҥештен толыт гын, ий вашке кая. Чодыраште мераҥ-влак эше ошо улыт гын, лум эше лумеш, кугу поранат лийын кертеш; мераҥ-влак суремыныт гын – шошо вашке толеш.

5 март – Курык гыч мунчалтыме кече. Тиде кечын пытартыш гана курык гыч мунчалтыман. Йӱдым кавашке ончаш тыршыман огыл. Шӱдыр вочмым ужат гын, экшык лийын кертеш манылдат. Лектыш сай лийже манын, апшат кудо гыч шолгымым налман да пасуш намиен шолыман.

6 март – Леве мардеж пуалме кече. Тиде кечын леве мардеж пуаш тӱҥалеш – шошым толаш ӱжеш. Тидлан кӧра уремыште шукырак коштман.

7 март – Кайык-влак пӧртылаш тӱҥалме кече. Тиде кече гыч кечывал кундем гыч кайык-влак чоҥештен толаш тӱҥалыт.

Шемгорак кече. Кайык-влак (шемгорак-влак) шокшо кундем гыч пӧртылыт гын, шошо вашке толеш.

8 март – Шогертен-влак чодыраш кайыме кече. Тиде кечын шогертен-влак чодыраш чоҥештен каят да пыжашым опташ, але тудым опташ верым кычалаш тӱҥалыт.

Качым сымыстарыме кече. Тиде кечын марлан лекдыме ӱдыр-влаклан каче-влакым сымыстараш тыршыман. Тидын верч, каче-влак йыр пӧрдышт манын, еҥ-влак уждымо годым, пурла таганыш шогалын пӧрдман, каче-влак чӱчкыдын толышт манын, шӱкым урем гыч пӧртышкӧ ӱштман.

9 март – Кайык-влак пыжашым опташ тӱҥалме кече. Тиде кечын, пыжаш опташ вийышт лийже манын, тыгыде кайык-влакым пукшыман.

Колызо-влак тиде кечын кол сайын чӱҥга маныт.

Кайык-влак пыжашым кечывалвелне оптат гын, кеҥеж йӱштӧ лиеш. Киса мура гын, шокшо лиеш. Мурышо кайык пиалым сӧра. Тылзын тӱкыжӧ пӱсӧ да ояр гын, йӱштӧ лиеш.

10 март – Йӱштымужо кече. Тиде кечын уремыште чийыде коштат але кече шичме деч ончыч малаш возат гын, йўштымужо пижын кертеш. Чер ынже пиж манын, тудым тӱрлӧ йӧн дене юлыман.