24 декабрь – Вувер-влак чоҥештылме кече.

24 декабрь – Вувер-влак чоҥештылме кече. Тиде кечын вувер да локтызо-влак пасу ден уремла мучко чоҥештыл коштыт, ӱштервоштырышт дене ӱштын пургыжтат. Сандене уремышке амал деч посна лекман огыл да малаш ончычрак вочман. Вувер-влак деч утлаш манын, тулым ылыжтыман да кечым вашкерак нӧлташ йодман. Вес ой почеш, тиде Йӱштӧ, кече кужемаш тӱҥалмым шижын, орадылана да пӧртышко кылмыкташ пураш тырша. Кеч-мо гынат, осал ынже пуро манын, лондемышке, пӱсыж дене омсашкыла, товарым пыштыман. Черле еҥ-влаклан тиде кечын корнывожыш шогалман да мардеж дене ломыжым шалатен колтыман – мардеж черыштым налын кая. Каче-влаклан йӧратыме ӱдырыштым савыраш йӧнан кече. Тидым ышташ кастене уремыш лекман да шикш ваштареш шогалын юлыман.

Кастене корак-влак, верым муде, чоҥештылыт гын, поран лектеш. Ур-влак ик рожышко тӱшка дене чумыргат гын, йӱштӧ лиеш.

Шӱдыр ончен (астрономический) у ий водо. Ожсо йӱла почеш, Шорыкйол, Шочьйол але Шортйол пура – тиде йӱд деч вара кече, пычкемыш дене кучедалмаште сеҥымеке, кужемаш тӱҥалеш.