22 декабрь – Пире кече.

22 декабрь – Пире кече. Тиде кечын пире-влак ўрышкӧ чумыргат да Вўд модмо кече (19 январь) марте огыт ойырло. Ты жапыште нуно поснак лўдыкшӧ улыт.

Акрет жапыште пирым чыла калыкат жаплен илен. Ик могырчын тудо сай улеш: марий мифлаште ия ден шўкшондал-влакым кочкеш, герман мифлаште Один юмын пелен эре кок пире коштеш. Вес могырчын пире (але пий) вес тўня дене кылдалтын. Мутлан, акыр саман Рагнарёк годым скандинав-влакын Тюр юмышт Гарм лўман пий дене кредалшаш, а Один – Фенрир лўман пире дене. Тиде кечын Пиямбар дечын серлагышым йодман, вет вольык ден айдемым пире-влак дечын лач тиде юмо арален шога.

Тиде кечын мўшкыран ўдырамаш-влаклан нимогай пашам ышташ ок лий.

Мўкш ончышо-влакын кечышт. Мўкш ончышо-влаклан тиде кечын Мўкш Ава деч мўй перкем йодман. Рашрак лияш гын, мўкш ончымо паша дене кылдалтше чыла юмымат жаплыман. Теве нунын лўмышт: Мўкш Шочын, Мўкш Пуйыршо, Мўкш Перке, Мўкш Пиямбар, Мўкш Ава, Мўкш Сакче, Мўкш Саус, Шиште Корно Паластарыше, Мўкш Казначий, Саска Пуйыршо, Пу ӧрт, Мўкш Переста, Мўкш Он.

Игече сай шога гын, 31 декабрьыштат (Вольык Ильяным жаплыме кече) сай лиеш. Пушеҥгеш пӧрш возеш гын, 31 январь пылан, а лектыш сай лиеш.