21 декабрь – Теле Кӱсӧ.

21 декабрь – Теле Кӱсӧ. Тиде кечын Кече дене кылдалтше Кӱсӧ Юмым жаплыман. Тудет пычкемышым сеҥен кертше манын, кастене сортам ылыжтыман. Вет тиде йӱд эн кужу улеш. Йӱдым тӱня-влак коклаште омса комдык почылтеш да мемнан деке унала, мӧчор лийын, кугезына-влак толыт. Нуно сурт еда коштыт. Кӧ нуным пагала да тамлын сийла – суапым пуат, кӧ суртышкыжо ок пурто але удан вашлиеш – осалым ыштат. Тӱня-влак кокласе омса 25 декабрь марте комдык почылтын шога. Тылеч вара эркын петыралташ тӱҥалеш да Вӱд модмо кече (19 январь) деч вара йӧршын петыралтеш.

Шӱдырым шкет шӱдырымӧ да ургымо-тӱрлымӧ кече. Тиде кечын ӱдыр ден ӱдырамаш-влаклан шкет шӱдырен але урген-тӱрлен шинчыман. 21 декабрьыште тӱрлымӧ тӱр юзо виян улеш да тиде тӱран вургемым чийышым тӱрлӧ эҥгек деч арала.

Игече умыр да йӱштӧ гын, теле леве да луман лиеш. Киса да моло кайык-влак шылаш верым кычалыт гын, пургыж лектеш. Поран тӱҥалеш гын, кеҥеж йӱран лиеш. Киса-влак эрок чогыматат гын, йӱдлан кылмыкта.