2 январь – Кудыводыжым жаплыме кече.

2 январь – Кудыводыжым жаплыме кече. Тиде кечын Кудыводыж деч суртым аралаш йодман. Кудыводыж рушлаже "Домовой" але "Кудный бог", "Кудник" манылтеш. Тыште марий Кудыводыж ден Кудник коласе кыл раш шижылтеш. Вет "кудо" акрет индоевропейский шомак. А индоевропейский тиште-влак дене акрет жапыште кыл пеҥгыде лийын. Рашрак лияш гын, лач нуно шкеныштым "марий" маныныт да калыкнан ик тӱҥ ужашыже улыт. Вес тӱҥ ужашыже - самодий, саам тукым тиште-влак. Лач тыге финн-угор калык-влак шочыныт. Саам тукым тиште-влак шкеныштым "саам", "сумь", "коми", "шем" маныныт. Очыни, лач тышечын "шемер" мут. Кызытсе йылмыш кусараш гын, "саам марий" лиеш.

Олмапум рӱзымӧ кече. Тудым ынже кылме манын рӱзыман.

Тиде кечын игече могай, август тугай лиеш. Пушеҥгеш пӧрш возеш - кава канде – игече ояр лиеш.