19 декабрь – Теле Миколо кече.

19 декабрь – Теле Миколо кече. Миколо Юмо ик могырчын марий Юмын Он, Кугу Илыш Шочын, Илыш Шочын Ача, Кӱсӧ Юмылан лишыл. Рашрак лияш гын, нине – ик юмынак тӱрлӧ лӱмжӧ-влак. Вес могырчын – Мер Юмылан, Кугыеҥлан але Мер Кугыеҥлан. Сандене тиде кечын Кугу Илыш шочын ден Мер Юмым жаплыман. Тиде кечын йолташ-влак да таҥ дене кылым пеҥгыдемдаш тыршыман. Миколо Юмым южо вере чимарий-влакат лач тиде лӱм дене жаплат, сандене калык календарьыште лӱмжым она вашталте. Англичан йылмыш кусараш гын, Миколо шнуй, але юзо Миколо - Санта Клаус лиеш. Миколо Юмо тыгак колышо-влакын чоныштым эҥер гоч вес тӱняшке луктеш. Тидын шотышто Теле Миколо айдеме-влаклан нужгол семын кончышо Йомшеҥерлан (Кугу Илыш шочын Юмын посна сынже) да Йамази кува ден Йамази кугызалан лишыл улеш. Йомакысе Емеля юзо нужголым - Йомшеҥерым, очыни, лач тиде кечын кучен.

Тиде кечын пӧрш возеш гын, лектыш сай лиеш. Корным лум авырен кая гын, теле гоч авыраш тӱҥалеш. Тиде кечылан лум мыняре возеш, шудат тунарак кушкеш.