14 январь – Васли кече, Сӧсна пайрем. Тошто У ий.

14 январь – Васли кече, Сӧсна пайрем. Тошто У ий. Южо ялыште мӧчӧр-влакым тиде кечылан кӧра Васли кува да Васли кугыза маныт.

Ожно, конешне, Шорыкйол – Шочйолым вес йӧн дене рашемденыт. Но шӱдыр-влакым эскерымым чарнымеке, нуным кузе лудмым мондымеке, марий-влак руш календарьым эскераш тӱҥалыныт. Революций деч ончыч, Юлиан календарь почеш, ятыр вере Шорыкйолым лач тиде кече деч вара палемдаш тўҥалыныт. Григориан календарьыш куснымеке, кызытсе У ий (1 январь) гыч шотлаш тӱҥалыныт. Амалже – калык эн кужу йӱдым кузе рашемдымым монден да руш календарьлан ӱшанаш тӱҥалын. Кеч-мо гынат, 25 декабрь ден 14 январь коклаште кыл пегыде.

Игече луман да йӱштӧ гын, идалык лектышан лиеш. Кава шӱдыран да яндар гын, пурса ден емыж умат, поран пургыжта гын, пӱкш ума.