Келшымаш
+9 °С
Йӱр
Все новости
Туризм да экологий
5 Пургыж 2021, 13:23

Эколог-краевед-влакын сеҥымашышт

Мемнан тунемшына-влак «Мыйын шочмо кундемем: пӱртӱс, культура, этнос» всероссийский конкурсын региональный этапыштыже сеҥышыш лектыныт

Эколог-краевед-влакын сеҥымашышт
Конкурс 2020 ий октябрь гыч 2021 ий январь марте эртен. Тудым БР-се образований да наука министерство ден Йоча экологий да биологий рўдер эртареныт.
Конкурсышто 10 гыч 18 ияш марте йоча да самырык-влак вийыштым терген кертыныт. Тунемше-влак тунемме-шымлымаш паша-влакым возеныт («Этно-экологический шымлымаш» номинацийыште), материальный культура арвер-влакым фотографироватленыт («Этноэкологий да кызытсе жап» номинацийыште), публицистический произведений-влакым возеныт («Этно-экологический журналистика» номинацийыште), путеводитель-влакым оформитленыт да маршрутым ямдыленыт («Эко-гид» номинацийыште), верысе калык йўла нерген творческий пашам ыштеныт («Шочмо кундемысе духовный да экологический йўла» номинацийыште).
Конкурсын муниципальный этапыштыже, а тудым 2020 ий ноябрьыште Мишкан районысо образований отдел ден «Путник» рўдер эртареныт, кум паша тергалтын. Ленинский ялысе школышто 7 классыште тунемше Наталья Бикнязева вуйлатышыже Т. Шулепова дене пырля шорык меж гыч носким пидаш тунемын. Нерге ялысе школышто тунемше Ярослав Гареев вуйлатышыже Л. Гареева дене пырля шочмо вер-шӧрысӧ топонимикым шымлен. 2 №-ан Мишкан кыдалаш школышто тунемше Анастасия Шамшитова вуйлатышыже А. Шамшитова дене пырля тувыртыш когыльым ыштыме нерген видеороликым возен. Тунемше-влакын пашашт моткоч оҥай лийын. Тидлан кєра районысо образований отдел ден «Путник» рўдер кум еҥынат пашаштым региональный этапышке колтеныт. Но тылеч ончыч «Путник» рўдерын пашаеҥже-влак дене пырля паша-влакым тӧрлымӧ да саемдыме. Вет шымлыме паша оҥай гына лийшаш огыл, тудым чын оформитлыман да конкурсын положенийжылан тичмаш келыштарыман – сай результатыш тыге гына шуаш лиеш.
Конкурсын региональный этапше идалык еда кок ужаш гыч шога – очный да заочный. Заочный этапыште пўтынь республик гыч 140 паша пурен, а очный этапышке 45 еҥым гына ўжмӧ. «Шочмо кундемысе духовный да экологический йўла» номинацийысе паша-влак заочно аклалтыныт. Конкурсын очный этапышкыже мемнан район гыч Наталья Бикнязева ден Ярослав Гареев логалыныт. Ончыч тиде этап Уфа олаште эрта ыле, но тений, коронавирус кумдан шарлымылан кєра, тудо Zoom гоч эртаралтын.
«Мыйын шочмо кундемем: пўртўс, культура, этнос» всероссийский конкурсын региональный этапшын итогшо почеш, Ярослав Гареев ден Анастасия Шамшитова шке номинацийыштышт икымше вер-влакым налыныт. Нунын пашаштым «Мыйын шочмо кундемем: пўртўс, культура, этнос» всероссийский конкурсын заочный этапышкыже колтымо. А Н. Бикнязева конкурсышто чолган участвоватлымыжлан диплом дене палемдалтын.
Конкурсын участникше-влак ден нунын вуйлатышыштлан тыгай пашам ыштымыштлан чон гыч лекше тау мутым ойлымо шуэш. Вет тыгай конкурслаште участвоватлымаш районын чапшым нєлталаш да калык йўлам аралаш полшат.
Фирдаус КАДИКОВА (материалым «Путник» рўдер пуэн).