Эн сай вич команда коклаш логалынна!

Эн сай вич команда коклаш логалынна!

БР-се Чекмагуш районышто «Чайка» йоча лагерьыште Республик кўкшытан XXVI самырык эколог-влак слет эртен. Слет Башкортостан Республиклан 100 ий теммылан лўмлалтын.

Самырык эколог-влакын усталыкыштым посна жюри аклен. Тушко УФИЦ РАН Уфа оласе биологий институтышто, Башкирский государственный да Башкирский государственный аграрный университетлаште туныктышо-влак, БР-се чодыра озанлык министерствын, БР-се пўртўс поянлык дене пайдаланыме да экологий министерствын специалистше, Республиканский экологий да биологий йоча рўдерын пашаеҥже-влак пуреныт.

Тений слетышто пўтынь республик гыч 12 команда вийжым терген. Кужу жап шуйнышо отборочный турым эртымеке, практический этапышке мемнан командынамат ўжмӧ. Командышке пуреныт: гидробиолог Андрей Апсатаров (Мишкан селасе 1 №-ан лицей), зоолог-энтомолог Ксения Байгузина (Ленинский ялысе школ), почвовед Анастасия Узденова (Кемий ялысе школ) да ботаник Татьяна Уразгулова (2 №-ан Мишкан кыдалаш школ). Командым Кемий ялысе школышто туныктышо Алена Саляева вуйлатен.

Слетын программышкыже тўрлӧ мероприятий-влак пуреныт. «Командын визитный карточкыжо», «Пале да мошто» да моло командный конкурс-влак деч посна слетын кажне участникше шкенжын номинацийыштыже посна собеседованийым эртен, заданий-влакым решатлен, пўртўс объектлаште экологический шымлымашым эртарен да текшырымашын результатшым арален. Туныктышо ден тунемше-влаклан туныктымо-методический школ эртаралтын. Организатор-влак слетын участникше-влаклан пайдалын канашыштат йӧным ыштеныт. Чекмагуш район мучко оҥай экскурсий организоватлалтын. Ӱдыр-рвезе-влак «Чекмагуш- Арена» леведышан ий катокыш, Чекмагуш селасе историй да краеведений музейыш, Юмаш селашке миеныт. Юмаш селаште тунемше-влак школын исторический музейжым, Христос шочмо лўмеш храмым, БАЗЫ ял озанлык предприятийын шӧр сату фермыжым ужыныт. Тылеч посна ДЮСШ-н педагогшо-влак ўдыр-рвезе-влак коклаште тўрлӧ таҥасымашым эртареныт. Тушто мемнан тунемшына-влакат ойыртемалтыныт. Мутлан, Татьяна Уразгулова баскетбол топым оҥгыш кышкымаште, оҥго-влакым кышкымаште сеҥен. Слетын пытартыш кечыштыже Самырык рўдерын пашаеҥже-влак оҥай дискотекым эртареныт.

Икмыняр кече шижде эртен да слетысо конкурс-влакым иктешлашат жап шуын. Чумыр командный зачетышто мемнан командына 5-ше верым налын. Ӱшаныза – тиде пеш сай результат. Вет пытартыш кок ий жапыште ме конкурсын практический ужашышкыже йӧршын логалын кертын огынал. Мемнан эн самырык экологна Ксения Байгузина «Зоологий/Энтомологий» этапыште чолгалыкым ончыктымыжлан Кумылаҥдыше грамота дене палемдалтын. Андрей Апсатаров экологический публикаций конкурсышто сеҥен да «Гидробиологий» номинацийыште призер лийын.

Командынам тыгай сеҥымашышт дене алал кумылын саламлена да наставник-влак А. Саляевалан, Л. Шамшияровалан, О. Яшпаевалан сай командым ямдылымыштлан тау мутым ойлена.

Фирдаус КАДИКОВА ямдылен (материалым «Путник» рўдер пуэн).