Келшымаш
-9 °С
Лум
Все новости
Туризм да экологий
30 Шыжа 2020, 16:07

«Ечыгорно» дене ошкылыт

Скандинав йӧн дене коштшо-влак Мишкан курыкысо пӱнчерыште кошташ йӧратат

«Ечыгорно» дене ошкылыт
Чыланат палат: чодыра дене коштмаш айдемылан тӱрлӧ чер деч эмлалташ вийым пуа, чонжым луштара, алал кумылым шочыкта.
Эн эмлылан пӱнчӧ да кож чодыра шотлалтыт. Нине пушеҥге-влак воктене юж пайдале частица, эфир ӱй-влаклан поян. Нуно шинчаш огыт кой, но южым шӱлалтен ме чыла шижына.
Сабантуй олык воктенсе пўнчерыште коштмаш тазалыклан пайдамат конда, кумылымат нєлта. Арам огыл мишкан-влак тушто чӱчкыдын коштыт. А канен кошташ чыла йӧн уло: «ечыгорно трасса» кеҥежымат, телымат арулыкышто кучалтеш. Тидын верч «Тазалык» ФОК ден йоча-юношеский спорт школ кугун тыршат. Октябрь тӱҥалтыште Тӱнямбал арулык кечын нине организаций пашаеҥ-влак пӱнчер курыкыш кӱзеныт да тушто арулыкым пуртеныт. Чӱчкыдын «тазалык йолгорныш» пушеҥге-влак камвозыт – то шоҥгеммыштлан кӧра, то кугу мардеж сӱмыра. Тыгай утларакшым шошым да шыжым, мланде нӧрымӧ да пушкыдемме жапыште лиеш. Тидлан кӧра ДЮСШ да ФОК пашаеҥ-влак «ечыгорным» эре эскерен шогат: сӱмырлышӧ пушеҥге ден шӱкым эрыктат, шудым солат.
Нунылан тауштен мемнан деке Мишкан селаште илыше Эмма Султаншина возен. Тидым ышташ тудын дечын верысе пенсионер-влак йодыныт. Нуно ФОК директор Николай Зайнитдиновлан, физкультурым туныктышо-влаклан «тазылык йолгорным» арулыкышто кучымыштлан чон гыч лекше тау мутым ойлат. «Курык дене коштмына годым шинчана куана, чонна кана да йолна нойымым ок шиж!», - ойлат пенсионер-влак.
А ме илалше-влаклан, нунын чолга илышым илымыштлан куанена. Илалшына-влак эн чот скандинав йєн дене кошташ йєратат. Пытартыш ийлаште спортын тиде видше Мишкан селасе пенсионер-влаклан эн чот келша.
Скандинав йєн дене коштмаш нелылык шотышто кум кўкшытлан шелылтеш: тызалыкым вияҥдыме, фитнес да спорт. Илалше-влаклан тазалыкым вияҥдымаш келшен толеш. Кап-кылым шуарыме деч посна скандинав йӧн дене коштмаш кумылым нєлта. Тоя-влаклан эҥертен коштмаш тупысо да кидысе чогашыл-влаклан вияҥаш йӧным ышта. Тыглай куржталмаш тидым ышташ йєным ок пу. А пўнчерыште коштмаш шӱмымат вияҥдаш полша, имунитетым пеҥгыдемда, уш-акылым яндар ышта.
Южо еҥ скандинав йӧн дене тӱшка дене кошташ йӧрата. Тыге иканаште кошташ да мутланаш лиеш. Южо еҥ шкетын, вашкыде коштеш. Икманаш, кӧлан мо келша.
Но еҥ-влак кеч-кузе коштыт гынат, пўнчерыште коштмаш тазалыкыштым палын вияҥдаш полша. Чодыра юзо виян, а пӱнчӧ чодыран юзо вийже кок гана кугырак.
Светлана ТОЙМУРЗИНА.