Медсестра-влакым жаплыме

12 майыште районысо поликлиника ончылно Тўнямбалсе медсестра кечылан лўмлалтше мероприятий эртен. Нунылан салам шомакым рўдӧ районный больницын тўҥ врачше Валерий Гареев ден тўҥ медсестраже Лена Латыпова ойленыт. Тўҥалтыш профсоюз организаций лўм дене медсестра-влакым Айрат Гафуров саламлен.
- Шерге да йӧратыме медсестрана-влакым профессиональный пайремышт дене алал кумылын саламлена! – каласен Айрат Гафурович. – Те эре пашаште улыда, чўчкыдын шинчын каналташ жапдат уке, тидлан ӧрман огыл – вет те еҥ-влакын тазалыкыштым араледа да илышыштым утареда. Ме тыланда уло шўм-чонна дене ятыр куаным, суапым да сеҥымашым тыланена. Тек тендан суртышкыда ойго нигунам ок пуро, тек эҥгек чыландамат кораҥын эрта. Ныжыл медсестрана-влаклан тыгак ўдырамаш пиалым тыланена, вет те эн ондак лач ўдырамаш улыда. Тек тендан пашада тыланда алал кумылым пєлекла да пиалан лияш полша.
Салам шомак деч вара пашаштышт ойыртемалтше медсестра-влакым палемдыме. Россий Федерацийысе здравоохранений пашаеҥ-влак профсоюзын БР-се организацийже деч тауштыме серышым 2021 ийын итогшо почеш «Профессиональный ушемын пашаште сак лийме шотышто эн сай уполномоченныйже» республиканский отраслевой конкурсышто участвоватлымыжлан Лина Александрова палемдалтын. Моло-влакым тамле пєлек вучен – пайрем вашеш кажне отделенийлан тутло тортым пӧлеклыме.
Тўнямбалсе пайремышт дене медсестра-влакым саламлаш Мишкан селасе Культура пӧртын пашаҥже-влак миеныт. Ош халатым чийыше ўдырымаш-влаклан сылне муро-влакым Культурын заслуженный пашаеҥже Равия Саматова, Ирина Аликаева, Олеся Мусалина муреныт. Данил Аслямов баяным йомартлын шоктен. «Березка» мурышо ансамбль медицина пашаеҥ-влаклан кумылым савырыше муро-влакым пӧлеклен.
Медсестра-влаклан эн шергыже тазалыкым тыланымаш лийын, вет нуно тазалыкын акшым моло еҥ деч сайын палат.
Светлана ТОЙМУРЗИНА.