Келшымаш
-11 °С
Лум
Все новости
Тазалык
15 Шыжа 2021, 13:43

Сак лийман

12 октябрьыште Мишкан селаште коронавирус шарлымым ончылгоч кораҥдаш виктаралтше мера-влакым шуктымым терген лекме

Сак лийман

П. Трапезников вуйлатыме межведомственный комиссий икмыняр объектым терген. Текшырыше-влак «Триумф» ФОК-ыш, агропромышленный колледжыш, Мишкан селасе 1 №-ан лицейыш, 2 №-ан Мишкан кыдалаш школыш, Культура дворецыш, рўдӧ районный библиотекыш, Марий ИКЦ-ш миеныт.
Чыла объектыштат пурымаште профилактика да социальный дистанцийым эскерыме шотышто информаций вераҥдалтын. Моло йодмаш-влакат шукталтыт.
Поснак Культура дворецын медицинский инспекторжо Радик Гильмияровын пашажым палемдыме шуэш. Пурымына годым тудо мемнан дечын вакцинаций нерген сертификатым ончыкташ йодын, температурынам висен, киднашке антисептикым шыжыктен. Марий историй да тўвыра рўдер оролат, «Триумф» ФОК кассират, Агропромышленный колледжын вахтержат мемнам «пистолет-термометр» дене вашлийыныт.
Но изирак ситыдымашат пернен. Библиотекыште орол изишак ӧрын да температурынам висен огыл. Тиде объектыште тидым коклан ышташ мондат докан.
Температурынам Мишкан селасе школлаштат висен огытыл. 2 №-ан школышто охранник комиссийым маске деч посна вашлийын, температурымат висен
огыл. 1 №-ан лицейыштат тидым ышташ монденыт але ӧрыныт. Но тушто кеч маске режимым тўткын эскерат. Нине объектлаште, конешне, орол ден вахтер-влак район администраций вуйлатышым ужын ӧрын кертыныт. Но тыге лийшаш огыл. Ончыкыжым тыгай ситыдымаш ынже лий манын, П. Трапезников нунын дене мутланымашым эртарен. Вет йодмаш чыла дечат икгай лийшаш. Ушештарена: 1 октябрьыште БР вуйлатыше Р. Хабиров, коронавирус кумдан шарлымылан кєра, Сак лийме нерген пунчалым луктын. Пунчалын у редакцийже дене келшышын, 12 октябрь гыч вакцинацийым эртыме нерген сертификат але COVID-19
дене куд тылзе деч ончычрак огыл черле лийме нерген справке деч посна музей, выставочный зал, библиотек, торгайыме рўдер, моторлык салон, косметик, СПА-салон, массаж салон, солярий, монча, сауна, ФОК, фитнес-клуб, бассейн, общепит зданийлашке пураш, междугородний автобус, «Орлан» пригородный поезд дене кошташ ок лий. COVID-19 дене черле улмо огыл нерген справке дене нине заведенийлашке 27 октябрь марте гына пураш лиеш. Ончыкыжым тегак вакцинаций нерген справке кўлеш лиеш.
Районысо калыкым сак лийме мера-влакым шукташ да вакцинацийым эртыдыме-влаклан вашкерак прививкым ыштыкташ йодына.
Светлана ТОЙМУРЗИНА.

Сак лийман
Автор:Светлана Тоймурзина