«Сак лийза! Суртыштыда лийза!»

«Сак лийза! Суртыштыда лийза!»

Тидлан кӧра ме Мишкан рӱдӧ районный больницыш миен толаш да тушто калыкын тазалыкше верч кузе тургыжланымым, тидын верч могай мера-влакым приниматлымым текшыраш лийна.

Ондак ме мом ужынна? У корпусыш пурымо омса петыралтын. Зданий кӧргышкӧ вес омса гыч гына пураш лиеш – тушто приемный отделений верланен. Пурышо-влакым дежурный медшӱжар-влак вашлийыт. Пурымеке, вес йолчиемым але бахилым чийыман. Дежурный-влак кидым антисептик дене мушмым тӱткын эскерат. Кажне пурышын температурыжым висат. Чылажымат тўткын тергат.

Пурымеке, мый Мишкан рӱдӧ районный больницын тӱҥ врачшын эмлыме паша шотышто заместительже Зиля Гатична Малмыгина дене мутланышым.

- Ме моло жапысе семынак пашам ыштена, манаш лиеш. Вашталтыш, конешне, уло. Пашам 8.00 гыч 19.00 марте ыштена. Пурымаште йўдшє-кечыже посна медперсонал дежуритла. Кызыт профосмотр ден профилактический медосмотр-влак огыт эртаралт. Тыгак карантин увертаралтын – черле-влак деке пураш ок лий. Передача-влакым дежурный-влак гоч гына пуаш лиеш. Черле-влак больница кєргыштат коштын огыт керт.

Мероприятий план дене келшышын, экстренный госпитализаций маршрутат вашталтын.

- Пневмоний дене черле-влаклан посна вниманий ойыралтеш?

- Терапевтический отделенийыште пневмоний да ОРВИ дене черле-влаклан 2 палата ойыралтын. Пневмоний дене черле-влак чыланат COVID-19 вируслан анализым сдатлат. Кызыт пневмоний диагноз дене кум еҥ эмлалтеш. 65 ияш деч шоҥгырак-влакым терапевтический отделенийыш огыт пыште.

- Инфекционный отделенийын пашаже кузерак вашталтын?

- COVID-19 вирус дене черле-влак рашемдалтыт гын, Бирский медицинский округысо госпитальный база переформироватлалтеш.

- Ынде мобильный группа дене палдарыза.

- Мобильный группылаште фельдшер-влак пашам ыштат. ОРВИ дене черланыше-влак лийыт гын, участковый врач-влак суртышкышт мият. Черлын тазалыкшым тергымеке, амал уло гын, нуно коронавируслан анализым ыштат. Тиде анализым Уфашке колтат.

Тыгак суртышко миен 65 ияш деч кугурак-влак ден идалык марте йоча-влакын тазалыкыштым тергат.

У больница зданий гыч лекмем годым тыгай йодыш шочо: «А пӱй коршташ тӱҥалеш гын, мом ыштыман? Зубной кабинет деке кайыме коридор петыралтын, еҥ-влакат тушто огыт кой». Тиде йодышлан мылам дежурный медшӱжар-влак вашештышт:

- Иктаж еҥын пӱйжӧ чот коршта гын, пациент-влак стоматологический отделенийыш мият. Врач-стоматолог-влак ончычсо режим денак пашам ыштат. Но медосмотр-влак, поликлиникысе семынак, огыт эртаралт.

Больница деч вара ме поликлиникыш пурышна. Туштат мемнам дежурный-влак вашлийыч, температурым висышт да кидым дезинфицироватлаш йодыч. Шинчалан виклан еҥ-влак шагал улмаш койын. Очыни, медицинский текшырымаш-влакым эртарымым чарымылан кӧра. Мый поликлиникыште кугурак администратор Анжела Забаранилова дене мутланышна.

- Йоча-влак поликлиникыш посна омса гыч пурат. Тиде омса зданийын шола могырныжо. Толшо еҥын темпуратурыжо кугу да тудет шукерте огыл вес эл гыч пєртылын гын, тудым виклан изолироватлат. Поликлиникысе моло паша вашталтын огыл.

Регистратурышто ешареныт: врач-влак деке, тӱҥ шотышто, телефон дене йыҥгыртен возалтыт, но утларакшым суртышкышт ӱжыт. Возалтме годым мыняр шагатыште толшаш рашемдалтеш, сандене кабинет-влак воктене черет-влак огыт кой.

Палемден кодыман: март тылзыште Мишкан рӱдӧ районный больницаште «Башкортостан Республикыште гигиена да эпидемиологий рӱдер» ФБУЗ-ын Бирский межрайонный филиалжын тӱҥ врачше Ю. Садовский дене пырля «Действия медицинского персонала при выявлении пациента с подозрением на коронавирус» практический тернировка эртаралтын. Тушто больницыш коронавирус дене черле еҥ толеш гын, мом ыштышашым рашемдыме. Тыгай случай лиеш гын, чыла службышкат черле еҥым рашемдыме нерген увертаралтеш, пациентым посна учрежденийыш эвакуироватлыме паша дене кылдалтше медицина пашаеҥ-влак ӱжылтыт, биоматериал налылтеш, черле еҥ толмо транспорт ден тудо лийме верлаште санитарный обработка ышталтеш. Тыгак медперсоналым индивидуальный аралтыш средства-влак дене пайдаланаш (противочумный вургемым чияш да кудашаш) туныктымо, Башкортостан Республикысе здравоохранений министерствын представительже дене кылым пеҥгыдемдыме. Тренировка деч вара иктешлымашым ыштыме да ситыдымаш-влакым кораҥдаш палемдыме.

Тылеч вара инфекционный отделений пашаеҥ-влак денат мутланаш кумыл лекте. Но тидым телефон дене гына ышташ йєн лие. Самоизоляций жапыште отделенийын пашаж дене медшӱжар Алла Владимирова палдарыш.

- Кызыт отделений план дене келшышын пашам ышта. Март тӱҥалтыш гыч медперсонал дене арня еда посна инструктаж эртаралтеш – инструкций-влак вашталтын шогат. Кажне кечын оперативкыште коронавирус республикыштына шарлыме динамика рашемдалтеш, COVID-19 вирус дене кылдалтше моло йодышат ӧрдыжеш ок код. Чаманаш кодеш, аралтыш маске-влак шагалрак улыт. Ситуаций уда могырко вашталтеш гын, неле лиеш. Мемнан деке COVID-19 вирус дене черле еҥ логалеш гын, 1 врач ден 2 медсестра тудын воктене 14 кечылан кодыт, тылеч вара эше 14 кече нуно абсерваций зонышто лийыт. Тидлан кєра инфекционный отделенийыште ыштыше кажне еҥын «дежурный чемоданчикше» уло. Тушто тудын личный гигиеным эскераш арверже-влак ден вашталтен чияш вургемже аралалтыт. Йӧн дене пайдаланен, кажне еҥ дечын йодына: «Самоизоляций режимым ида пудырто. Мемнан верчын суртыштыда шинчыза. Шкендам аралыза!»

Татьяна ГОРДЕЕВА.