Мишкан районышто санитарный безопасность мемнан деч шога

Мишкан районышто санитарный безопасность мемнан деч шога

Коронавирус шарлыме жапыште Башкирийыште пеҥгыде бытовой шӱкшак шукемын. Суртышто петыралт шинчыме годым еҥ-влак шке пӧртыштым, пачерыштым эрыктат, шукырак кочкыт, тыгак лӱдыкшӧ медицинский отход шукемеш. Тидын годым шӱкшаклан тӱлымаш шагалемын. Тидыже клиент-влакым обслуживатлыме рӱдер-влакын петыралтмышт дене кылдалтын.

Тыгай неле саманыште «Дютюлимелиоводстрой» ООО региональный оператор пеҥгыде бытовой шӱкшакым шупшыктымо пашам тӱрыснек шуктен шога. Пашаеҥ-влак калык илыме верлаште санитарно-эпидемиологический сосотоянийым тийышле кӱкшытыштӧ кучышашлан верч пашам сайын ыштат. Поснак шӱкшакым шупшыктышо машина-влакын водительышт шке тазалыкышт дене рисковатлат. Вет нуно кечымучко тӱжем дене еҥын кышкыме шӱкшакышт дене пашам ыштат да кастене суртышкышт пєртылыт.

Калыкын жапыштыже да тӱрыснек тӱлен шогымыжо региональный операторлан кӱрылтыш деч посна пашам ышташыже йӧным пуа: шўкшакым лукшо подрядный организаций-влаклан тӱлаш, ГСМ-ым налаш, пашаеҥ-влаклан пашадарым тӱлаш да шӱкшакым погымо дене кылдалтше моло роскотым петыраш. Тӱла пурыдымылан кӧра Российын южо регионлаштыже мусорный коллапсыш лишемыт. Башкирийыште ме тыгай сценарийым кораҥшаш улына, эн ончычак мемнан олана ден селана-влакын санитарный безопасностьыштым коронавирус инфекций шарлыме жапыште аралышашлан тидыжым ыштыман.

Башкортостанын пӱртӱс дене пайдаланыме да экологий министрже Урал Искандаров республикыште илыше-влак деке темлымаш дене лектын: кучылтмо медицинский маске ден перчатке-влакым чын упаковатлаш (посна пакетыш пышташ), контейнер шогымо верлам шӱкшак ораш савыраш огыл да шӱкшакым лукмылан жапыштыже тӱлаш.

- Суртышто шинчыме годым ужыда, шӱкшак погымо пакет-влак писын темыт, контейнер площадке-влак оралалтыт, - палемден Урал Искандаров.- Тидын годымак мусоровозын водительже, грузчик, сортировщик, полигон пашаеҥ-влак шке тазалыкышт дене рисковатлат. Вет нуно миллион еҥын шӱкшакше дене пашам ыштат. Шукыж годым ме нунын улмышт нерген огынат шоналте. А нуно таче мемнан безопасностьнам аралымаште ончыл линийыште улыт.

ТКО-лан тӱлаш самоизоляций режимым пудыртышаш уке - мӧҥгӧ гычак онлай-сервис-влак гоч тӱлаш лиеш: региональный операторын сайтыштыже личный кабинет гоч dmsrb.ru (комиссий деч посна); мобильный приложений гоч (тудым Coogle Play але AppStore гыч качатлаш лиеш); Интернет-банк гоч да банк-влакын мобильный приложенийышт гоч; квитанцийыште ончыктымо QR-код дене.

Тӱлымӧ нерген уверым региональный операторын официальный сайтыштыже личный кабинетыште муын кертыда. Тендан илалше ача-авада мобильный канал дене пашам ыштен огыт мошто гын, нунылан сурт гыч лектде ӱлаш полшыза. Личный кабинетышке икмыняр лицевой счетым пурташ лиеш.

В. Абукаев.