ППМИ калыкын илышыжым саемдаш полша

Районыштына ППМИ программа полшымо дене ятыр илем ден объект тўзаталтыт. Латик ий жапыште ятыр корно ден тротуарым чоҥымо, уремлам волгалтарыме, водопроводым шупшмо, пожар годым вўдым налаш верым келыштарыме, зданийым чоҥымо, йоча площадке, спорт объект-влакым ыштыме.
Каласен кодыде ок лий: утларак объект калыкын йодмыжо да тыршымыже почеш чоҥалтын. Вет могай объектым олмыктымо але чоҥымо йодыш калык погынымаште, тыглай еҥ-влакын ойыштым шотыш налын рашемдалтеш. Молан манаш гын, проектыште калыкынат надырже лийшаш. Конешне, верысе власть
дечат паша кугун шога. Калыкым кумылаҥден моштыман, еҥ-влак дене пашам ыштыман. Икманаш, кӧ кава гыч волен вочмым вучен ок шинче, ситыдымаш-влакым кораҥдаш йӧным муын шога.
Декабрь тўҥалтыште Тӧҥгак ял калык ППМИ-ште участвоватлыме шотышто каҥашаш клубышто погынен. Погынымаште ял уремым олмыкташ кутырен келшыме. Кызытеш шыжым да шошым урем дене кошташ моткоч неле.
Мемнам, Мишкан села гыч мийыше-влакым, калык клуб тич погынымаш ӧрыктарен. Но, калык шуко лийын гынат, эпидемиологический йодмаш-влакым чыла шуктымо.
ППМИ-н кураторжо Зинаида Шамсутдинова ондак погынышо-влакым программыште участвоватлыме условий-влак дене палдарен. Тудо умылтарен: республикын бюджетше гыч субсидий тунам гына ойыралтеш, кунам калык шкат оксам пога, верысе бюджет гычат надыр пышталтеш да юридический лицо-влакат спонсор полышым ончыктат.
Калык пашам ыштышаш суммын 5 процентшым погышаш (10 процентым пога гын, эше сайрак), муниципалитет 10 процент деч шагалрак огыл ойырышаш (эн
шукыжо – 15 процент). Спонсор полышым юридический лицо ден индивидуальный предприниматель-влак ончыктен кертыт. Йодмашым тергыме годым надырым
пыштыше кажне категорийлан 10 балл марте оценке шындалтеш.
Проект сеҥышыш лектеш гын, республик оксам ойыра, тудын эн кугу суммыжо – 1 миллион теҥге. Зинаида Анатольевнан выступленийже деч вара ял калык
каҥашаш тўҥалын. Мом ыштыме шотышто икмыняр темлымаш лийын: водопроводым олмыкташ, у павильоным шогалташ да корным олмыкташ. Калыкын утларак ужашыже ял уремым тўзатыме верч йўклен. Погынымашке Тӧҥгакыште шочын-кушшо, но моло вере илыше еҥ-влакат миеныт. Нуно шочмо ялыштлан проектыште сеҥаш полшаш сӧреныт.
Погынымаште тыгерак мутланен келшыме: сельский поселений 150 тўжем теҥгем погышаш, кажне сурт 2400 теҥгем пуышаш. Тыгак тиде пашашке спонсор-влакым ушаш палемдыме. Тылеч вара инициативный группым сайлыме. Тушко чолга да чулым еҥ-влакым гына пуртымо. Тыште еҥ-влакын авторитетышт
да тўрлӧ пашам ыштен моштымышт шотыш налылтыныт. Вет тиде группыш пурышо еҥ-влак калык дене мутланен, конкурсный йодмашым возен, ыштыме пашалан сметым ыштен моштышаш улыт. Сметный документаций государственный экспертиза органыште текшырымашым эртышаш да йодмаш дене пырля пуалтшаш.
Инициативный группа председательынат пашаже мутым кучыман: тудо сельский поселений администраций вуйлатыше дене пырля йодмашым подписатла, шуктымо пашам приниматлыме годымат подписьшым пышта. Икманаш, пашан качествыжлан мутым куча. Тыге 7 еҥым сайлыме: Е. Байрамовам, И. Дигитаевам,
Л. Исламовам, А. Ахмадиевым, В. Илиевым, И. Андриановам, Г. Васиным. Группа председательлан Е. Байрамова сайлалтын.
Погынымаш деч вара калыклан изирак концертым ончыктымо. Кажне музыкальный номерыште корнын уда улмыжо палемдалтын.
Венера АГЛЯМОВА.