Келшымаш
-8 °С
Пылан
Все новости
Тӱрлӧ
19 Кылме 2021, 15:17

Школ леведышым вашталтыме

Кугу Соказа сельсовет сельский поселенийыште ППМИ-2021 программа полшымо дене эше ик объектым олмыктымо

Школ леведышым вашталтыме

Кугу Соказа ялысе кыдылаш школ зданийын леведышыже палын тоштемын лийын. Шыжым да шошым южо вере йўр вўд шурчен йоген. Тиде школ 1978 ийыштак чоҥалтын да капитальный ремонтым кужу жап вучен.
Тиде идалык тўҥалтыште ялыште калык погынымаш эртен. Тушто ик ой дене ППМИ-2021 программыште участвоватлаш да тудын полшымо дене школ леведышым вашталташ пунчалме. Тылеч вара инициативный группым сайлыме. Тушко чолга, чулым, организаторский усталыкан еҥвлакым пуртымо. Нуно проектым илышыш шыҥдараш полшаш да пашашт дене калыкым палдарен шогышаш лийыныт. Пашам тыге ыштымаш сай лектышым пуэн.
Верысе инициативылан полыш программа кышкарысе проектым илышыш шыҥдараш 1 миллион 269 тўжем теҥгем ойырымо. Тушечын 951 тўжем 750 теҥгем -
республик бюджет гыч, 139 тўжем 590 теҥгем – сельский поселений бюджет гыч. Спонсор-влак 88 тўжем 830 теҥгем пуэныт, тыгаяк суммым верысе калык, школ да йоча сад пашаеҥ-влак, школын тўрлӧ ийласе выпускникше-влак погеныт.
Подрядный организаций шке пашажым кўлеш семын шуктен. Строитель-влак тошто леведышым рончен налыныт, у леведышым вакшыныт да тудым кєргє
гычын шокшемденыт. Ынде школ зданий моткоч моторын койын шога.
12 ноябрьыште «Кугу Соказа ялысе кыдалаш школ леведышым вашталташ материалым налмаш» проектым илышыш шыҥдарыме лўмеш торжественный мероприятий эртен. Тушко район администрацийын представительже-влак да верысе сельсовет СП администраций пашаеҥ, проектым илышыш шыҥдараш полшышо да тыглай еҥ-влак миеныт. Мероприятийым салам шомак дене школ директор Ирина Карпова почын. Тудын ойжо почеш, школ пырдыжыште «Школа твоя, береги ее!» шомак ушешыже курым-курымешлан кодын да илыш девизышкыже савырнен. Тудо школ погым ондак тунемше, варажым тыглай туныктышо семын аралаш тыршен гын, ынде директор семын арала да тўзаташ тырша. Тиде паша идалык еда 1 сентябрь вашеш шукталтеш.

- Ме школыштына кажне ийын мом-гынат уэмден шогена, - ойла школ директор. – То школ оралтыште асфальтым вакшына, то капкам вашталтена. 2017 ийыште «ППМИ-2017» программа полшымо дене кӧргӧ отоплений системым вашталтенна ыле, моло ийлаште спортзал леведыш ден кўвароҥажым, электропровода-влакым вашталтенна.
«Доступная среда» программа кышкарыште школышто кўвароҥа-влакым вашталтыме, столовыйым уэмдыме, чыла кабинетыште огыл гынат, евро-окна ден
евро-омса-влакым шындыме, шокшо шонданым ыштыме. Тений ППМИ-2021 программа полшымо дене леведышымат вашталтен кертна. Эше, «Раш паша» программа кышкарыште, вич окнам вашталтенна. Ынде школна йӧршын вес сыным налын. Ме ўшанена: тудо ончыкыжымат уэмын да моторештын шогаш тўҥалеш.
Ирина Карпова Мишкан район МР Совет депутат Вячеслав Сабировлан да верысе сельский поселений администраций вуйлатыше Станислав Сергеевлан ППМИ программыште сеҥаш да палемдыме пашам мучаш марте шукташ полшымыштлан тау мутым ойлен.
Вячеслав Александрович Кугу Соказа мландыште шочын-кушкын. Тидлан кєра тудлан тиде кундемыште чылажат шерге. Землякше-влаклан салам шомакыштыже
тиде раш шижылтын.
Тудын салам шомакым ойлымыж деч вара мутым Мишкан район МР администраций вуйлатышын финанс йодыш шотышто заместительже – финанс управлений начальник Зинаида Шамсутдиновалан да Мишкан район МР Совет секретарь Татьяна Колединалан пуымо.
Салам мут-влак деч вара торжественный обстановкышто суапле пашаште ойыртемалтше-влакым палемдыме. Мероприятий пайрем концерт дене мучашлалтын. Калыкым шкеныштын выступленийышт дене тиде кечын Йоча искусство школын Кугу Соказа ялысе филиалыштыже (Ирина Шамуратова вуйлата) тунемше ўдыр-эрге-влак куандареныт.
Светлана ТОЙМУРЗИНА.

Школ леведышым вашталтыме
Автор:Светлана Тоймурзина