Оҥгыр йўк йоҥгалтын

Шинчымаш кечын ме Кемий ялысе кыдалаш школышко торжественный линейкым ончаш мийышна. Тиде школым арам огыл ойырен налынна – кемий-влак у тунемме ийлан ямдылалтме шотышто конкурсышто кумшо верым налыныт. Тиде школышто келшен илыше коллектив пашам ышта. 16 туныктышо кокла гыч 14 туныктышыжо высший категориян улеш. Школ зданий, тунемме кабинет-влак, школ оралте ару да мотор улыт.
Школышко Кемийыште илыше-влак веле огыл, пошкудо ялла гычат йоча-влак тунемаш коштыт. Тений тушто 138 йоча тунемеш. 8 йоча икымше классыш тунемаш пурен, выпускной классыште 7 ўдыр-рвезе тунемыт.
- Тиде пайрем у тунемме ийыште икымше улеш. А икымше классыш тунемаш толшо-влаклан оҥгыр йўк икымше гана йоҥгалтеш, - вўдышӧ-влак пайремым тыгай шомак дене тўҥалыныт.
1 классыш тунемаш толшо-влаклан кугу опытан туныктышо Людмила Мусагитдинова «кокымшо авашт» лийын.
Вўдышє-влак пайремым почмо деч вара мутым школ директор Лиана Каримовалан пуэныт.
- Тиде пайрем чоным вургыжтарыше да кумылым нєлтышє пайрем улеш. Таче школ шкенжын омсажым элнан ончыкылыкшым чоҥышаш йоча да самырык-влаклан почеш, - тўҥалын шке шомакшым Лиана Фанавиевна. – Чын, школышто тунемаш куштылго огыл, но школ образованийын «багажше» мыняре нелырак, илыш корно дене ошкылаш, шонымашке шуаш, сай пашам муаш тунаре куштылгырак лиеш. А тидым ышташ, шерге тунемше-влак, тыланда туныктышо-влак ден ача-авада-влак полшат.
Тылеч вара школ директор погынышо-влакым чылаштымат у тунемме ий тўҥалме дене саламлен да ача-ава-влаклан, школ коллективлан школым олмыкташ да тўзаташ полшымыштлан тау мутым ойлен.
Саламлымашке тыгак район администрацийын представительже Дамир Рысаев, образований отделын представительже Гузель Фархутдинова да Кемий сельсовет СП администраций вуйлатыше Герман Байдимиров ушненыт.
Салам шомак-влакым колыштмеке, чыланат алал кумылын икымше классышке тунемаш толшо йоча-влакын выступленийыштым онченыт. Нуно тиде кечын почеламутым ойленыт да мурым муреныт.
У тунемме ийыште оҥгыр йўкым икымше гана пуаш чапым 1 классыште тунемше Дарина Шаркаева ден 11 классыште тунемше Ильнар Загитовлан пуымо.
Торжественный линейка деч вара тунемше-влак шкеныштын классышкышт класс шагатышке пуреныт.
Венера АГЛЯМОВА.