Келшымаш
+5 °С
Дождь
Все новости
Тӱрлӧ
2 Апрель , 14:35

Салам, шошо!

Март мучаште Нерге ялыште телым ужатыме пайремым эртареныт.

Чеверын, теле! Салам, шошо!
11 шагатыште клуб воктеке калык погынаш тўҥале. Ӱдырамаш-влак кидешышт шокшо, тамле кочкышым кучен пайремыш толыныт. Лўмын ямдылыме ўстел пайрем сий дене писын темын. Теве Л. Каншаева когыльо ден пирожким, Л. Шуматбаева, Р. Ишпахтина, Т. Байгазова олма когыльым, Д. Александрова тувыртыш когыльым конденыт. Моло-влакат яра кид дене толын огытыл.
Эн ончыч «Кӧн мелнаже тамлырак» конкурс эртен. Конкурсышто участвоватлыше-влак Н. Яндуганова, Л. Миндиярова, С. Яникеева, Л. Иванаева, С. Каншаева, М. Гареева, О. Ишпахтина, мелна кышылым кучен, «Пиал капка» гоч эртышт. Нуно мелнашт дене ял калыкым сийленыт, а конкурсым аклыше-влак чылаштынат мелнашт тамле манын палемденыт да кажныжлан пєлекым кучыктеныт.
Телым ужатыме пайремым Монар сельсоветын депутатше С. Каншаева почын. Пайремыш погынышо-влакым шошо толмо дене саламлымеке, «Ӱжара» ансамбль «Как на тоненький ледок» мурым йоҥгалтарен. Варажым С. Каншаева ден С. Яникеева такмак-влакым шергылтареныт. Верысе артист-влак «Шаде воктен» мурым пӧлекленыт.
Телым ужатен колтымеке, шошым тывырдыкым куштен вашлийыныт. Кумылан-влак тыштак шокшо чайым подыл кертыныт. Культура пашаеҥ-влак тўрлӧ оҥай модмаш-влакым ямдыленыт. Модмашлаште изижат, кугужат чон канен модыныт. Мутлан, йолыш мешакым чиен куржмаш, издереш еҥым шынден шўдырен куржмаш, кандырам шупшын таҥасымаш да молат. Модмаш-влак деч вара адак марла куштымо. Вара куштыракувам йўлатыме.
Куштыракува йўлымӧ годым «Чеверын, йўштӧ теле! Салам, мотор шошо!» почеламут йоҥген. Тыгодымак еҥ-влак шкаланышт да лишыл еҥышт-влаклан тазалыкым йодыныт, черым поктен колташ, ялыште икте-весе дене келшен илаш, вуй ўмбалне тыныс кава лийже манын тыланеныт.
Пайремыште эн чолга еҥ-влаклан пӧлекым шалатыме.
Пӧлек-влакым налаш мемнан спонсорна, «Ӱжара» ансамбль полшен. Тиде пайремым организоватлыше да эртарыше культура пашаеҥ-влаклан шўм гыч лекше таум ойлена. Калыклан пайрем пеш келшен.
М. ГАРЕЕВА.