Все новости
Тӱрлӧ
5 Ӱярня , 14:09

Пиалан ўдырамаш

Тыматле койышыжо Р. Яметовалан пашаште сеҥымашыш шуаш, ешыште йєратыме пелаш да пиалан ава, кувава лияшыже йӧным ыштен

Пиалан ўдырамаш
Рима Яметова Мишкан рўдє районный больницын инфекционный отдленийыштыже медсестра лийын уже 35 ий ышта.
Рима Ивановна 1966 ийыште Айбылат ялыште шочын. Шукерте огыл, 26 январьыште, тудо 55 ийым темен.
Шуко икшыван ешыште Рима визымше икшыве лийын. Ачаже, Иван Иксанович, ўмыржӧ мучко подстанцийыште электрик лийын ыштен. Аваже, Елена Янышевна, ондак колхозышто пашам ыштен.
Пенсийыш лекмыж деч ончыч шым ий Мишкан ЦРБ-ште дезинфектор пашам шуктен. Аважын пытартыш паша верже Рималан ончыкылык пашам ойырен налаш полшен.
- Мый авамын коллегыже – медицина пашаеҥ-влак ўмбаке кӧранен онченам, - ойла Р. Яметова. – Нуно чыланат ару ош вургемым чиен коштыныт.
Мый нунын пашаштым эре эскеренам, еҥ-влак дене порын мутланымышт, профессиональный долгыштым тыршен шуктымышт кумылым савырен. Тыге ончыкыжым шкат лач тыгай пашаеҥ лияш кумылаҥынам. Тидлан кӧра медсестра профессийым ойырен налынам.
1983 ийыште 1 №-ан Мишкан кыдалаш школым тунем пытарымеке, Рима Пўрӧ оласе медицинский училищыш тунемаш пурен. Кок ий ик татла эртен каен – вет самырык жап пеш писын эрта. 1985 ийыште ўдыр Мишкан рўдӧ районный больницышке инфекционный отделенийыш пашаш пурен. Пашам але мартеат лач тушто ышта.
Тўрлє инфекционный чер дене черле-влакым эмлаш куштылго огыл – эмлызе шкат черланен кертеш, изи йоҥылышым ышта гынат, тудо виклан шижылтеш.
Но Рима Яметова 35 ий жапыште нимогай лўдыкшӧ да мут кучымаш дечын лўдын огыл. «Кўлеш – тугеже ыштыман!», - ойла тудо эре шкаланже да пашажым кўлеш семын ышта.
- Мемнан отделенийыште чыланат чын профессионал улыт, - ойла коллегыже-влак нерген Р. Яметова. - Мутлан, Инна Шахмадеева тыште уже 32 ий ышта, Олеся Шамиданова – 24 ий, Алла Владимирова – 21 ий, Марина Саликова – 7 ий. Коллективна пашам келшен ышта. Пашанам отделений вуйлатыше Мариан Феликсович Алексеев виктара.
...Рима Яметова илышыште шке вержым муын. Тудо чонжылан келшыше пашам ышта да тудым сайын шукта. Ӱдырамаш да ава пиалымат илышыштыже муын.
Пелашыже – Илья Владимирович дене пырля шукерте огыл чинче сўаныштым палемденыт. Еш вуй юрист улеш. Яметовмыт кок эргым ончен куштеныт. Кугурак Иван эргышт ешыж дене Ханты-Мансийский автономный округышто, Сургут олаште ила. Ватыже – Камила. Нунын кум ияш Макар да ик ияш Ева ўдырышт уло.
Яметовмытын изирак Володя эргышт ача-ава дене пырля ила. Армий гыч пӧртылмеке, Когалым олаште вахта йӧн дене пашам ышташ тўҥалын.
Илья Владимирович ден Рима Ивановнан суртыштышт, озаватын тыршымыжлан кєра, эре арулык озалана. Нунын деке
мийымеке, мый 88 ияш Елена Янышевна дене палыме лийым. Тиде тыматле койышан да поро чонан ўдырамашым ужмеке, Рима Ивановнан молан тыгай улмыжым виклан умылышым.
- Авана илыме годым ме эре икшыве гына улына, - шыргыжалын каласыш мемнам ўстел тєрыш ўжмыж годым озавате.
А ўстелыште тўрлӧ сий моткоч шуко лийын. Утларакшым – шке ыштыме когыльо-влак дене сад-пакча гыч пӧлек.
Рима Ивановнан мутшо чын улеш. Мыланна авана кеч-могай татыштат эре эн шерге улеш. Тудын дечын сайын мемнам нигє
ок умыло, лач тудлан ме эн шерге улына. Икманаш, авана воктенна мыняре шукырак ила, ме тунаре пиаланрак улына. А Рима Ивановна чынжымак пиалан ўдырамаш улеш, вет тудо йӧратыме пашажым ышта да воктенже эре лишыл еҥже-влак улыт.
Светлана ТОЙМУРЗИНА.