Презе шочмым палемденыт

Презе шочмым палемденыт

Лидия Аспаевна ты пайремым кажне ийын эртара. Теве теният йӧратыме Маруся ушкалже презылен. Оза вате презылан Мишук лўмым пуэн.

Лидия Ишкинина дене ме 25 ий ваш келшен илена. Мыняр шарнем, эре ушкал вольыкым ашнен. Тудын ўстелыштыже шӧр гыч ыштыме кочкыш нигунам йомын огыл. Ондак вольык ончаш пелашыже да кум эргыже полшеныт, ынде озанлык сомылым шкетын виктара. Еш вуй Володян ош тўня гыч кайымыжлан ынде куд ий, кугемше эргыже-влак ешым чумырен, тўрлӧ вере шаланеныт. Мутат уке, кертмышт семын ынде шымше ий сулен налме канышыште улшо аваштлан полшен шогат.

Презе шочмаш Лидия Аспаевалан кугу событийыш савырна. Презе шочмеке, ушкал икмыняр кече кишан шӧрым пуа. Лач тиде шӧр дене марий-влак шкеныштын ик эн йӧратыме кочкышыштым - тувыртышым шолтат. Тиде марий национальный кочкышым кочкаш родо-шочшо, пошкудо да лишыл еҥ-влакым ўжыт. Тений Лидия Аспаевна деке тувыртышым кочкаш мыят логальым. Эн ончычак сурт озалан ўжмыжлан тауштышна, вара презылан таза лияш, ушкаллан шуко шӧрым пуаш тыланышна. Калыкмутымат шарналтышна. Тувыртыш кочмо кечын суртыш эн ончыч пӧръеҥ толын пура гын, вес ий ўшкыжаш презе шочеш, ўдырамаш пура гын - ушкалаш. Ты калыкмутын чын улмыжым вес ий рашемдена.

Л. БАЮРШИНА.