Койыш изинек шуаралтеш

Койыш изинек шуаралтеш

Вашлиймашке 1 степенян старшина Вячеслав Сабиров, старший мичман Ильдар Зарипов, старший матрос Нина Зарипова, майор Александр Асмаев, 1 степенян старшина Ольга Сайпашева, матрос Роман Апсаликов толыныт.

Вячеслав Александрович моряк-влакын илышышт гыч шуко оҥайым ойлен. Тудо военный еҥын моральный шўлышыжлан да профессиональный ямдылалт- мыжлан кугу верым ойыра. Командым пеҥгыдын шуктымым, командирын мутшым колыштмым, поснак экстремальный ситуаций годым, эн кўлешанлан шотла. Теҥызыште улмо годым командирын мутшым чылан колыштшаш улыт. Тидын дечын чумыр командын илышыже шога. Сандене ик еҥынат шке семын иктаж-мом ышташ шонымашыже йӧршын лийшаш огыл. Тыгай ситуаций годым айдемын илышыже верч ответственностьым шижме кумыл шочеш.

Александр Алексеевич патриотизм темым тарватен. Лач патриотизм шўлыш шуко самырык еҥым военный профессийым налаш кумылаҥда. Тудо военный учебный заведений-влак нерген ойлен, тушко тунемаш пурымо жап да условий-влак дене палдарен. «Сай офицер да специалист лияш нелылыкым сеҥаш да койыш-шоктышым шуараш тунемман», - палемден тудо шке выступленийыштыже. Вашлиймаш годым йоча-влак тўрлӧ йодыш-влакым пуэныт, моряк-влакын илышышт гыч шуко оҥайым пален налыныт.

Тиде вашлиймаш йоча-влаклан пеш келшен. Уна-влакын оҥай выступленийышт йоча-влаклан гына огыл, кугыеҥ-влакланат келшен. Вашлиймашым шарнымашеш кодышашлан тўшка фотографийым ыштыме да тиде фотом уна-влаклан пӧлек шотеш пуэныт.

Тыгай мероприятий-влак самырык тукымым патриотически воспитатлаш, военный профессийым пагалаш, Отечествылан ўшанле лияш туныктат.

Вашлиймаш деч вара «Зарница» военно-патриотический модмаш эртен. Школышто 23 февраль вашеш тыгай модмашым эртарымаш поро йўлашке савырнен. 5-9 класслаште тунемше-влак коклаште оҥай таҥасымаш-влак эртеныт. Команда-влак модмаш тўҥалмым вученыт. Ондак тўшка построений, команда-влакын рапортышт, команда дене палдарымаш лийын. Судья-влак кажне командын ямдылыкшым тергеныт. Маршрутный листым налме деч вара таҥасымаш тўҥалын.

Команда-влаклан шым этапыште шке шинчымашым ончыкташ кўлын. Кажне этапыште команда-влак очком погеныт.

Модмаш пеш веселан да пайдалын эртен. Кажне участникше умылен, таче «Икте чылан верч, чылан икте верч» калык мут эн ончылно лийын. Эсогыл тунык- тышо-влакат ӧрдыжеш кодын огытыл, кертмышт семын командыштлан полшаш тыршеныт.

Команда-влак чыланат шке этапыштым сайын эртеныт. Иктыже ик этапыште чолгарак лийын гын, весыже вес этапыште тудым ончылтен кертын. Сандене участник-влак иктешлымашым шўм-вургыж вученыт. Судья-влаклан куштылго лийын огыл, вет чыла команда сайын выступатлен. Но кеч-могай таҥасымаште сеҥыше лийшаш. Тыште «Монолит» команда сеҥышыш лектын. Команда-влак чыланат грамотым налыныт, а сеҥыше-влаклан эше тамле приз логалын. Пытартышлан чылаштым шокшо чай вучен.

Мутат уке, тыгай модмашлаште тунемше-влак тўҥалтыш военный ямдылалтмашым эртат, икымше медицинский полышым пуаш тунемыт да спорт деке шўмаҥыт.

В. ЯНГУАТОВА, Пўнчер школышто историйым да общество- знанийым туныктышо.