Отечествым аралыше-влакым саламленыт

Кугарнян кастене Культура дворецыште Отечествым аралышын кечыже вашеш пайрем концерт эртен

Пайрем касым «Солдат молоденький» муро дене «Березка» вокальный ансамбль ден «Эрвел» калык инструмент-влак ансамбль почыныт.

Вўдышє В. Кутлуметов саламлыме шомакым ойлаш район администраций вуйлатыше П. Трапезниковым ўжын.

Пайрем касыш толшо-влакым VII созыв Государственный Думын депутатше, Башкортостан Республикыште поисковый движенийым организоватлыше, Общероссийский калык фронтын региональный штабшын членже, запасысе полковник И. Бикбаев саламлен. Ильдар Зиннурович торжественный обстановкышто районысо ветеран-влак совет президиумын членже Е. Андреевлан кужу жап правам аралыме органыште тыршымыжлан да мер пашаште чолгалыкым ончыктымыжлан Тауштымашым кучыктен.

Варажым мутым Мишкан да Бурай районласе военный комиссар С. Васильевлан пуымо.

- 23 февраль чынжымак ик эн тўҥ государственный пайрем улеш: тиде кечын ме шке илышыштым Вооруженный Вий дене кылдыше, шочмо элнан тыныслыкшым аралыше-влакым жаплена. Тиде пайрем миллион дене еҥ-влаклан лўддымылыкым, геройлыкым, патриотизмым, шочмо эллан ўшанлын служитлымым ончыктышо символыш савырнен. Ме ончыкыжымат шочмо элнам аралыше-влакын геройло подвигыштым эре шарнаш тўҥалына. Россий салтак эре лўддымӧ улмыжо, сеҥаш тыршымыже, вашла полшымыжо дене ойыртемалтын, - палемден тудо шке выступленийыштыже.

Пайрем концерт сылне муро да куштымаш-влак дене калык чоным сымыстарен. Концертыште «Эрвел» куштышо калык ансамбль, Йоча искусство школын «Калейдоскоп», «Вдохновение» куштышо коллективышт-влак участвоватленыт. Тыгак мурызо-влак О. Мусалина, М. Салимов, И. Аликаева, С. Салиев, А. Ибулаев выступатленыт.

Пайрем концертыште «Аллеи воинской Славы» знакым шогалташ эскизым ямдылыше да ты сўрет конкурсышто сеҥыше-влакым наградитлыме.

Светлана ТОЙМУРЗИНА.