Самырык тукымым воспитатлымаш

Самырык тукымым воспитатлымаш

Самырык тукымым воспитатлымаш паша кеч-могай саманыштат тўҥ задачылан шотлалтын да шотлалтеш.

Кеч-могай государствылан таза, пеҥгыде, ушан-шотан, мутым колыштшан, тунемаш, пашам ышташ, шочмо эл верч тыршаш ямде улшо, кўлеш гын, элна верч илышыштым чаманыде кучедалше еҥ-влак кўлыт. Кызытсе Российланат тыгак. Сандене самырык-влакым патриотически воспитатлыме пашалан шагал огыл вер ойыралтеш.

Тўҥжӧ – самырык-влак элнан ончыкылык аралышыже улыт, тидлан кӧра нуным армийлан ямдылыме паша ик эн кўлешан пашалан шотлалтеш.

Военно-патриотический воспитаний чын патриот-влакым кушташ виктаралтеш. Элнам ончыкылык аралыше пеҥгыде койышан, мутым колыштшан, физически виян, чолга да чулым лийшаш. Но тыгай койыш самырык рвезылан армийыште веле огыл, ончыкыжым тўрлӧ пашаштат кўлеш лиеш. Мутлан, врач, строитель да моло пашам ыштыше-влаклан пеҥгыдылык, чолгалык моткоч кўлешан лийыт.

Патриотический воспитаний да самырык-влакым армийлан ямдылыме шотышто координационный советын заседанийыштыже шым йодыш каҥашалтын.

Армийыш кайышаш рвезе-влакын тазалыкыштым текшырыме – медосмотрым эртарыме шотышто йодыш почеш поликлиника вуйлатыше В. Гареев выступатлен. 2020 ийыште диспансеризацийым 268 рвезе эртен. Профилактический прививкым, кӧлан кўлеш, чыла ыштыме. Диспансерный текшырымашке 29 рвезым налме (15 ияш - 15 еҥ, 16 ияш – 14 еҥ). Диспансерный текшырымаште чылаже 106 рвезе шотлалтеш (15 ияш – 52 еҥ, 16 ияш – 54 еҥ). Нунын кокла гыч 1 еҥ туберкулез дене черле, 24 еҥ – психически таза огыл. Лу да чогашыл чер дене 27 еҥ черле улеш, вўр модмо системыже 25 еҥын таза огыл, 40 еҥ удан ужеш але шинча черже уло, 33 еҥын пагарже, мокшыжо, шолыжо черле. 97 еҥын умшажлан санацийым ышташ кўлын. III тазалык группышко чылаже 99 рвезе логалын (15 ияш – 50 еҥ, 16 ияш – 49 еҥ). III гыч II группыш 7 еҥым кусарыме. 8 рвезым диспансерный текшырымаш гыч кораҥдыме.

Йоча ден самырык-влакым патриотически воспитатлыме нерген «Путник» рўдер директор В. Князев ойлен. Вячеслав Айгушевич шкенжын выступленийыштыже палемден: военно-патриотический воспитаний самырык-влакым армийлан ямдылыме пашан ойыраш лийдыме ужашыже улеш, тыгай воспитаний деч посна самырык еҥ элнан сай да ўшанле гражданинже ок лий. Патриот-влакым воспитатлымаш туныктымо паша гына огыл, тыште посна государственный программа кўлеш да тиде программын йодмашыжым сайын шуктыман. «Путник» рўдерыште кугу вер самырык армеец движенийлан ойыралтеш. 2017 гыч 2020 ий марте районышто рвезе-влакым Самырык армий движенийыш вич гана торжественно пуртымо. Тиде паша Мишкан да Бурай районласе военный комиссариат да Мишкан районысо молодежь отдел дене пырля шукталтеш. Мутлан, самырык армеец радамышке Мишкан селасе 1 №-ан лицей ден 2 №-ан Мишкан кыдалаш школышто тунемше 17 рвезым пуртымо. Мишкан районышто – 205 рвезым. Районышто чылаже 13 отряд ышталтын. Тиде паша 2021 ийыште ок кудалталт.

Муниципальный районысо образований учрежденийлаште патриотический пашам кузе шуктымо нерген районысо образований отдел начальник С. Александров ойлен.

Районыштына могай спортивный мероприятий-влак эртаралтме нерген физический культура, спорт, туризм да молодежный политика шотышто комитет председатель Р. Ямаев палдарен. Мишкан районышто призывной комиссийын пашаж дене Мишкан да Бурай районласе военный комиссариатын комиссарже С. Васильев ойлен. Тудын выступленийже почеш рашемын: 2020 ийыште армийыш 107 рвезе каен, нунын кокла гыч 4 еҥже I разряд дене, эше икте – II разряд дене, кокыт – КМ разряд дене, шӧртньӧ ГТО значок – 5 еҥын.

Заседанийын повесткышкыже Патриотический воспитаний да самырык-влакым армийлан ямдылыме шотышто координационный советын паша планжым пеҥгыдемдымашым пуртымо. Тыште погынышо-влак ончылно молодежь дене отделын специалистше О. Биктубаева выступатлен.

2020 ийысе пашам иктешлымеке, пашаште ойыртемалтше-влакым палемдыме. Мишкан район МР администраций вуйлатышын социальный йодыш шотышто заместительже Л. Александрова нуным «Самырык армий» всероссийский йоча-юношеский военно-патриотический общественный движенийын БР-се региональный отделенийжын тауштыме серышыж дене палемден.

Светлана ТОЙМУРЗИНА.