У ийлан эн сай пӧлек

У ийлан эн сай пӧлек

Измар ялыште модульный ФАП 24 декабрьыште торжественно почылтын. Тудым «Здравоохранений» национальный проект кышкарыште ыштыме.

Ял калык тиде ФАП почмым кумылын вучен, вет ончычсо зданий моткоч тошто лийын.

- Куанем нерген ойленат сеҥен ок керт. Чылажат моткоч келшен. Зданий кугу, волгыдо, йоҥгыдо. Ынде пашашке уло кумылын кошташ тўҥалам! – ойла фельдшер Александра Баязитова.

Палдарен кодыде ок лий: А. Баязитова «Ялысе фельдшер» программа кышкарыште 500 тўжем теҥгеаш Грантым сеҥен налше улеш.

Фельдшерско-акушерский пункт ынде автономный режим дене пашам ышташ тўҥалеш, тушко электричестват, вўдат пурталтыныт. Ял калыкым кугу событий дене саламлаш Мишкан район МР Совет председатель В. Сабиров, Мишкан район МР администраций вуйлатыше П. Трапезников, Мишкан ЦРБ-н тўҥ врачше И. Абзалтдинов, Тымбай сельсовет СП администраций вуйлатыше Д. Янгубаев да Мишкан районысо ветеран-влак совет президумын членже А. Аптулманов миеныт.

Объектым чоҥаш полшышо-влакым Мишкан район МР да Тымбай сельсовет СП администраций-влакын тауштыме серышышт дене палемдыме. Нунын коклаште А. Байзаев, С. Баязитов, Ю. Алексеев, В. Янгубаев, А. Иванов, В. Ярмингин, А. Янгубаев, С. Янгубаев, Д. Байзаев лийыныт.

- Тиде событий ял калыклан У ийлан ик эн кугу пӧлек. Эртыше ий эше ик гана рашемден – эн шергыже мыланна – тазалык. Тидлан кӧра кажне еҥлан медицина карточкышт «таза» манын возымо гына лиймым тыланем, – каласен шкенжын выступленийыштыже П. Трапезников.

Выступлений-влак деч вара РДК пашаеҥ Олеся Мусалина калыкым сылне муро дене куандарен.

Арзамат ялысе модульный ФАП-ат, Измарысе семынак, «Здравоохранений» национальный проект кышкарыште чоҥалтын. Тудо 29 декабрьыште торжественно почылтын. Ял калыкым кугу событий дене саламлаш Мишкан район МР Совет председатель В. Сабиров, Мишкан район МР администраций вуйлатыше П. Трапезников, Мишкан ЦРБ-н тўҥ врачше И. Абзалтдинов, Арзамат сельсовет СП администраций вуйлатыше С. Саликов миеныт. Поро йўла почеш делегацийым

у зданий ончылно кинде-шинчал дене верысе фельдшер Лидия Алкиева вашлийын. Мутшо почеш, тудын ик эн кугу шонымашыже шукталтын – ялыштыже 6 кабинет гыч шогышо у, волгыдо да йоҥгыдо ФАП чоҥалтын. А кабинет-влак тыгай улыт: смотровой, процедурный, медперсонал кабинет, медикамент-влакым аралыме кабинет, прием кабинет, санузел.

Мишкан район МР администраций Башкортостан Республикысе Кугыжаныш Погын – Курултайын депуташе Салават Фаттахович Харасовлан районыштына ФАП-влакым чоҥаш полшымыжлан тау мутым ойла.

PS: У ий пайрем-влак деч вара у фельдшерско-акушерский пунктлашке у медицинский оборудований ден мебельым

кондымо: кушеткым, ўстелым, пўкеным, тумбочкым, шкафым, вакцина-влаклан холодильникым да молым.

В. АГЛЯМОВА.