«Пайрем идалык мучкылан чолгалыкым пуэн»

«Пайрем идалык мучкылан чолгалыкым пуэн»

Руслан Владиславович ден Виолетта Леонидовна Уфа олашке Тимур да Радимир эргышт-влак дене миеныт.

- Фестивальыш миен толмаш идалык мучкылан чолгалыкым пуэн, - кумыл нӧлтын ойла Виолетта Леонидовна. – «Динамо» стадионышто, а пайрем лач тушто эртен, мемнам волонтер-влак вашлийыныт да фестивальыште участвоватлыме радам дене палдареныт. Варажым тамле кечывал кочкыш дене сийленыт. Финалышке чылаже 62 еш команда лектын. Фестиваль нуным чылаштымат ушен, манаш лиеш – ме икте-весына дене палыме лийынна да икте-весылан полшаш тыршенна. Икманаш, стадионышто пайрем шўлыш озаланен. Таҥасымаш кум эстафета гыч шоген: ондак портышкемым чиен топ дене хоккей дене модынна, вара ийыште топым чумкаленна, мучашлан тюбинг дене мунчалтенна.

Фестиваль «Чумыр Россий» партийын региональный отделенийже, БР-се молодежный политика да спорт, образований министерство-влак ямдыленыт да эртареныт. Еш-влакым саламлаш РФ-се Госдумын депутатше-влак Рима Баталова ден Рафаэль Марданшин, Уфа оласе министерствын да администрацийын представительже, «Эдвис» туныктымо-методический рўдерын директоржо Эдуард Саитбаталов, образований министр Айбулат Хажин да моло миеныт.

Фестиваль сайын эртен. Мыланна тушто чылажат моткоч келшен. Эргына-влакын куанышт нимучашдыме лийын. Фестиваль мучаште мыланна дипломым да ик мешак тўрлӧ сийым кучыктеныт. «Чумыр Россий» партийын верысе отделенийжылан, мыланна тыгай пайремыш миен толаш йӧным ыштымыжлан, чон гыч лекше тау мутым ойлена.

В. ЯНСИТОВА.